Elordadaǵy «Járdem» ortalyǵynda 89 adamǵa turaqty áleýmettik qyzmet kórsetiledi
ASTANA. KAZINFORM — QR Eńbek jáne halyqty áleýmettik qorǵaý mınıstri Asqarbek Ertaev «Járdem» áleýmettik qyzmet kórsetý ortalyǵynyń jumysymen tanysty, dep habarlaıdy
QR Eńbek jáne halyqty áleýmettik qorǵaý mınıstri Asqarbek Ertaev Astana qalasy ákiminiń orynbasary Erik Meıirhanovpen birge Astana qalasy ákimdiginiń «Járdem» áleýmettik qyzmet kórsetý ortalyǵy» KMM-ne bardy.
Eńbek mınıstrliginiń basshysy mekemeniń qyzmetimen, arnaýly áleýmettik qyzmetter kórsetý úderisimen, qyzmet alýshylardyń turý jaǵdaıymen, ortalyqtyń materıaldyq-tehnıkalyq bazasymen tanysyp, ujymmen kezdesti.
Ortalyqtyń qyzmeti týraly mekeme dırektory Azamat Ospanov baıandady. Osydan eki aıǵa jýyq ýaqyt buryn ashylǵan «Járdem» ortalyǵy 18 jastan asqan, áreketke qabiletsiz dep tanylǵan jáne psıhonevrologııalyq aýrýlary bar múgedektigi bar adamdarǵa arnaýly áleýmettik qyzmetter kórsetedi. Mekemeniń negizgi maqsaty — qyzmet alýshylarǵa laıyqty ómir súrý jaǵdaıyn jasap, olardyń áleýmettik beıimdelýine, ońalýyna jáne jan-jaqty qoldaý kórsetýge jaǵdaı jasaý.
Ortalyqta qyzmet alýshylardyń ómir súrý sapasyn arttyrýǵa erekshe mán beriledi. Osy maqsatta qaýipsiz ári jaıly turmys jaǵdaılary jasalyp, ońaltý jáne áleýmettik beıimdeý sharalary uıymdastyrylǵan. Sondaı-aq olardyń qoǵamdyq belsendiligin arttyrýǵa jáne ózdiginen ómir súrý daǵdylaryn qalyptastyrýǵa basymdyq beriledi.
— Ortalyq 200 orynǵa eseptelgen. Qazirgi tańda munda 89 adam turady. Arnaýly áleýmettik qyzmetterdi bilikti mamandar kórsetedi. Jalpy ortalyqta 135 qyzmetker eńbek etedi. Mekemede segiz baǵyt boıynsha qyzmetterdiń tolyq kesheni usynylady. Olar áleýmettik-turmystyq pen medıtsınalyq kómekten bastap, psıhologııalyq, pedagogıkalyq jáne quqyqtyq qoldaýǵa deıingi qyzmetterdi qamtıdy. Qyzmet alýshylarmen psıhologtar, defektologtar jáne nusqaýshylar jumys isteıdi. Ońaltý sheńberinde olarǵa óz-ózine qyzmet kórsetý men kúndelikti turmysqa qajetti negizgi daǵdylar úıretiledi, — delingen habarlamada.
Ortalyq aýmaǵynda serýendeý aımaqtary men sport alańdary jabdyqtalǵan. Qyzmet alýshylar eńbek terapııasyna jáne túrli áleýmettik belsendilik sharalaryna tartylady.
Sapar qorytyndysy boıynsha Asqarbek Ertaev turaqty kútim men qoldaýdy qajet etetin azamattardyń laıyqty ómir súrý sapasyn qamtamasyz etýge baǵyttalǵan statsıonarlyq áleýmettik qyzmet kórsetý júıesin odan ári damytý mańyzdy ekenin atap ótti. Sonymen qatar ol qyzmet alýshylarǵa da, áleýmettik sala qyzmetkerlerine de qolaıly jaǵdaı jasaý jumystary júıeli túrde jalǵasýy qajet ekenin jetkizdi.
Buǵan deıin elimizde psıhologııalyq qyzmet týraly zań qabyldanǵanyn jazdyq.
