Elordadaǵy jantúrshigerlik kólik apatyna baılanysty sotqa deıingi tergeý bastaldy

ASTANA. KAZINFORM – Elordada bolǵan júk kólikteriniń apatyna qatysty polıtsııa sotqa deıingi tergeýdi bastady. Bul týraly Kazinform agenttigi Polıtsııa departamentiniń baspasóz qyzmetine siltememen habarlaıdy. 

– Aldyn ala málimet boıynsha, «Mercedes» júk kóliginiń júrgizýshisi qarsy jolaqqa shyǵyp ketip, «Sinotruk» júk kóligimen soqtyǵysqan. Oqıǵa saldarynan ekeýi de otqa oranǵan. Órtti sóndirý kezinde «Mercedes» avtokóliginiń kabınasynan júrgizýshiniń denesi tabyldy. Ol sol jerde kóz jumǵan. Al ekinshi júrgizýshi órt bastalǵanǵa deıin kabınadan sekirip úlgergen. Ol aman, - delingen habarlamada. 

Buǵan deıin qalalyq Densaýlyq saqtaý basqarmasy oqıǵa ornynan tabylǵan er adamnyń denesi qatty kúıip qalǵandyqtan, onyń ne ultyn, ne jasyn anyqtaý múmkin bolmaı jatqanyn málimdedi.

Aıta keteıik, Astanada eki júk kóligi soqtyǵysyp, artynsha órtke oranǵanyn jazǵan edik.