Elordadaǵy jańa travmpýnkt táýligine 30 balaǵa deıin qabyldaıdy
ASTANA. KAZINFORM — Astana turǵyndary jańa balalar travmpýnktin sheteldik deńgeıge teńep jatyr, dep habarlaıdy qala ákimdiginiń baspasóz qyzmeti.
Jaqynda elordanyń Nura aýdanynda jańa balalar travmpýnkti ashyldy. Atalǵan pýnkt eki apta ishinde túrli jaraqatpen kelgen 410 balaǵa bilikti medıtsınalyq kómek kórsetip úlgerdi.
Nura jáne Esil aýdandarynyń turǵyndary jańa travmpýnkttiń ashylýy úlken qolaılyq pen ýaqyttyń únemdeýine áser etkenin atap ótip jatyr.
— Keshe túnde qyzym saýsaǵyn shyǵaryp aldy. Jedel járdem shaqyryp, osy jerge keldik. Biz úshin óte yńǵaıly boldy, sebebi osy aýdanda turamyz. Aýrýhana tap-taza, sheteldegideı eken. Dárigerler tez qarap, bárin túsindirip, em taǵaıyndady. Barsha qyzmetkerlerge úlken rahmet! — dedi qala turǵyny.
Travmpýnkt medıtsınalyq kómek kórsetý úshin qajetti barlyq zamanaýı qural-jabdyqpen qamtamasyz etilgen. Joǵary tehnologııalyq apparattar satyp alynǵan, gıps salý, tańý jáne oıaný bólmeleri bar. Al mýltfılm keıipkerlerimen bezendirilgen dızaın balalarǵa jaılylyq pen qaýipsizdik sezimin syılaıdy.
— Іshke kirgende aýrýhana ekenin birden ańǵarmaısyń. Barlyǵy ádemi bezendirilgen, qabyrǵalarda mýltfılm keıipkerleriniń sýretteri bar. Medıtsınalyq qyzmetkerler sypaıy ári jyly júzdi. Balalarmen óz balalaryndaı sóılesedi. Munda bolý óte jaıly, — dep pikir bildirdi 5 jastaǵy Arslannyń anasy.
Travmatologııa bóliminiń meńgerýshisi, dáriger-travmatolog Alekseı Solodtyń aıtýynsha, táýligine 20-30 balaǵa deıin qabyldanady.
— Kóbine mektepke deıingi jastaǵy balalar keledi. Tipti bir jastaǵy balalar da bolǵan. Negizinen jeńil jaraqattarmen túsedi. Kópshiligi ambýlatorııalyq emge jiberiledi. Jumys istegen ýaqyt ishinde bar bolǵany 5 bala statsıonarǵa jatqyzyldy, — dedi dáriger.
Jańa travmpýnkt Hýseın Ben Talal kóshesi, 14 (Turan dańǵyly boıynda) mekenjaıynda ornalasqan. Travmpýnkt balalarǵa táýlik boıy qyzmet kórsetedi. Turǵyndardyń yńǵaıy úshin jaqynda bul baǵytqa № 83 avtobýs baǵyty iske qosyldy.
Eske salsaq, atalǵan pýnkt ashylǵanǵa deıin balalarǵa travmatologııalyq kómek № 2 kópbeıindi qalalyq balalar aýrýhanasyndaǵy jalǵyz travmpýnktte kórsetilip kelgen. Onda táýligine shamamen 300 bala júginetin.
Júktemeni azaıtý jáne medıtsınalyq kómektiń qoljetimdiligin arttyrý maqsatynda aldaǵy jyldary basqarma tarapynan 11 jańa medıtsınalyq nysannyń qurylysy josparlanyp otyr.
Buǵan deıin Densaýlyq saqtaý mınıstrligine DDSU tizimindegi dárilerdi tirkeý quzireti beriletinin jazdyq.
