Elordadaǵy Turan dańǵyly nelikten jáne qansha ýaqytqa jabyldy

ASTANA. KAZINFORM — Astana qalasynyń ákimi Jeńis Qasymbek Instagram paraqshasynda magıstraldy káriz kollektorynyń qurylysy júrip jatqanyn jetkizdi. 

«Ózderińiz biletindeı, 21 aqpannan bastap Turan dańǵylyndaǵy (Orynbor men Baǵlanova kósheleriniń arasy) ýchaskeniń bir bóligin ýaqytsha japtyq. Qazir munda magıstraldy káriz kollektorynyń qurylysy boıynsha jumys júrip jatyr. Bul nysannyń qalaǵa qanshalyqty mańyzdy ekenin qysqasha aıtyp óteıin. Qazirgi ýaqytta qalanyń sol jaǵalaý bóliginiń sharýashylyq-turmystyq sýy Máńgilik el dańǵyly, Kereı Jánibek handar kóshesi jáne Turan dańǵyly arqyly ótetin magıstraldy kollektordyń kómegimen aǵyzylady. Kollektor 16 jyl buryn salynǵan. Onyń uzyndyǵy — 6 km», - dep atap óti ákim.

Jeńis Qasymbektiń aıtýynsha, qalanyń qaryshtap damyp, aǵyndy sýdyń kólemi ulǵaıǵan. Al kollektor óz múmkindiginiń sheginde ǵana jumys isteıdi.

Kollektorǵa túsetin júktemeniń artýyna baılanysty onyń jumysynda irkilister bolady, al avarııalyq-qalpyna keltirý jumysy kútken nátıjeni bermeı otyr.

Elordanyń dál osy aýdanynda aǵyndy sýdy aǵyzýdyń ózge joly joq.

Al qoldanystaǵy qubyrdy odan ári paıdalanýdyń saldarynan aǵyndy sý jer betine kóterilip, birqatar kósheni basyp qalýy múmkin.

Sol sııaqty tehnogendik, ekologııalyq sıpattaǵy jaǵymsyz saldarǵa ákelýi múmkin.

«Sharýashylyq-turmystyq sýdy aǵyzý úshin arnaıy joba ázirledik jáne osy aıda Turan dańǵylyndaǵy magıstraldy káriz kollektorynyń qurylysyn bastadyq. Onyń uzyndyǵy — shamamen 8 km. Aıaqtalý merzimi — 9 naýryz. Qurylys qarqynyn jyldamdatýdy jáne merziminen buryn jol qozǵalysyn qamtamasyz etýdi tapsyrdym», — dep jazady Jeńis Qasymbek.