Elordadaǵy túngi órt: saýnadan shyqqan jalyn kottedjge ótken
ASTANA. KAZINFORM – Astana qalasynyń Almaty aýdanyndaǵy Sileti kóshesinde eki qabatty saýna ǵımaratynan órt shyqty. Jalyn saýnanyń bir qabatty japsarlas qurylysyna, keıin jaqyn ornalasqan eki qabatty kottedjdiń japsarlas qurylysyna tarady, dep habarlaıdy TJM baspasóz qyzmeti.
– Órt sóndirý bólimsheleri kelgen kezde ǵımarat ashyq janyp, jalyn órship ketken edi. Oqıǵa ornynda órt sóndirý shtaby quryldy. Órtti sóndirý úshin úzdiksiz sý jetkizý uıymdastyrylyp, birneshe órt oqpany engizildi. Qabyldanǵan sharalardyń nátıjesinde kottedjdi órtten qorǵap, jalynnyń odan ári taralýyna jol berilgen joq, – dep habarlady TJM.
Órtti sóndirý jumystaryna qoıý tútin kedergi jasap, joǵary temperatýra jáne jalynnyń jyldam taralýy jaǵdaıdy qıyndata túsken. Órttiń órshýine janǵysh materıaldardyń kóp mólsherde bolýynan týǵan joǵary órt júktemesi áser etipti.
Osylaısha, 540 sharshy metr aýmaqty sharpaǵan órt tolyq sóndirildi. Zardap shekkender joq. TJM mamandary órttiń shyǵý sebebin anyqtap jatyr.
Aıta keteıik, keshe Astanada kópqabatty turǵyn úıdiń birinde órt shyqty.
Sondaı-aq 31 mamyr kúni elordada jol ústinde turǵan jol talǵamaıtyn kólik órtenip, 5 adam zardap shekti.
