Elordadaǵy sport festıvalinde 6 jastan 93 jasqa deıingi qatysýshylar jarysty
ASTANA. KAZINFORM – Astana qalasynda 1 mamyr – Qazaqstan halqynyń birligi kúni aıasynda jáne «Taza Qazaqstan» respýblıkalyq ekologııalyq aktsııasyn iske asyrý sheńberinde sport festıvali ótti. Festıval Trıatlon parkiniń jańartylǵan jaǵalaýynda uıymdastyryldy, dep habarlaıdy elorda ákimdiginiń resmı saıty.
Astanalyqtar tań atpaı Trıatlon parkinde jınaldy. Buǵan sebep buqaralyq júgirý jáne balalar men jasóspirimder arasyndaǵy sport saıystary boldy. 5 shaqyrym júgiriske eki myńnan astam adam tirkelgen.
Sonymen birge, ótken festıvalde eń erekshe qatysýshylardyń biri – gýmanoıd-robot boldy.
Ol tek qonaqtardyń nazaryn aýdaryp qana qoımaı, jýgirý jarysyna da qatysyp, qashyqtyqty Ilıa Ilınmen birge baǵyndyrdy.
Bul sharanyń uıymdastyrýshylary – qalalyq sport basqarmasy men Almaty aýdannyń ákimdigi.
Sporttyq buqaralyq is-sharalardy ótkizý dırektsııasy basshysynyń orynbasary Erjigit Óserbaıdyń aıtýynsha, onlaın tirkeý ashý týraly sheshim turǵyndar tarapynan joǵary qyzyǵýshylyq pen ótinimderdiń kóp túsýine baılanysty qabyldanǵan.
– Búgingi is-sharada ártúrli jastaǵy qatysýshylar bar. Mysaly, balalar arasynda jarys 6 jastan bastalyp jatyr, al skandınavııalyq júriske 93 jastaǵy apamyz arnaıy Kókshetaýdan kelip qatysyp jatyr. Otbasymen kelgender de kóp, tipti 9 balasy bar otbasy da bar. Jalpy buqaralyq júgirýge 2000-nan astam adam tirkeldi, skandınavııalyq júriske 200-ge jýyq adam, balalar jarysyna 250-den astam bala qatysyp jatyr. Mundaı is-sharalar halyqty biriktiredi, sondyqtan aldaǵy ýaqytta da kóptep uıymdastyrylady, - dedi Óserbaı Erjigit.
Eresekter arasynda júgirýge qatysqandardyń biri – Beknur Táńirbergen. Ol baǵdarlamashy bolyp jumys istegendikten, kóbine kompıýter aldynda qozǵalyssyz otyratynyn aıtty. Mundaı is-sharalar densaýlyq úshin asa paıdaly.
– Jarys óte ádemi ótti. Óz basym sportshy emespin, biraq marafondarǵa jıi qatysyp turamyn. Keleshekte buıyrsa 10 jáne 21 shaqyrymda júgirip kórýge tyrysamyn. Búgin tempim 5 mınýt boldy, jalpy 2,5 shaqyrym júgirdim, jaraqatqa baılanysty sonymen shekteldim. Men baǵdarlamashy bolyp jumys isteımin, onlaın formatta bolǵan soń kóbinese úıde otyramyn. Osyndaı keremet is-sharalar kóp bolsa eken, Astana ákimdigine alǵysym sheksiz, - dedi Beknur Tańirbergen.
Buǵan deıin Astanada jazǵy júgirý maýsymy bastalǵanyn jazǵan edik.
