Elordadaǵy saıabaqqa 250 aǵash otyrǵyzyldy

ASTANA. KAZINFORM — Baıqońyr aýdanynda jappaı aǵash otyrǵyzý is-sharasy ótti, dep habarlaıdy qala ákimdiginiń resmı saıty.

Qaladaǵy kommýnaldyq uıymdardyń ókilderi – «Astana Sý Arnasy» JShS, «Astana Teplotranzıt» AQ, «Elorda ekosıstem» JShS jáne «AREK» AQ qyzmetkerleri Abylaı han dańǵylyndaǵy «Kommýnalshylar saıabaǵyna» 250 aǵash otyrǵyzdy.

Ekologııalyq senbilikke 250-den astam kommýnaldyq sala qyzmetkeri qatysty.

– Búgin munda birneshe kommýnaldyq qyzmet birigip jumys istep jatyr, ár uıymnan keminde 50 adamnan qatysýda. Biz aǵash otyrǵyzyp, aýmaqty tazartyp, jaıly orta qalyptastyryp jatyrmyz. Kóńil kúı kóterińki, al senbilik sońynda qatysýshylarǵa ystyq taǵam usynylady, óıtkeni aýa raıy salqyn, – dedi «Astana Sý Arnasy» MKK dırektorynyń orynbasary Erjan Sháripov.

Onyń aıtýynsha, mundaı ekologııalyq aktsııalar elordanyń barlyq aýdanynda ótip jatyr jáne olardyń maqsaty – qalanyń ekologııalyq ahýalyn jaqsartý men jasyl beldeýdi keńeıtý.

– Buǵan deıin biz bul saıabaqty abattandyryp, tóselmeli tasyn jańarttyq, shaǵyn sáýlettik nysandar men oryndyqtar ornattyq, stela qoıdyq. Sol sebepti ony «Kommýnalshylar saıabaǵy» dep ataýdy uıǵardyq. Búgin tórt iri uıym birigip, 250 aǵash – japyraqty jáne qylqan japyraqty túrlerin, sonyń ishinde shyrshalardy otyrǵyzdy. Bul aýdan turǵyndaryna jaıly orta qalyptastyryp qana qoımaı, elorda ekologııasyna da oń áser etedi, – dedi Baıqońyr aýdany ákimdiginiń óndiristik-tehnıkalyq bóliminiń basshysy Farhat Jylybaev.

«Taza Qazaqstan» aktsııasy aıasynda astanalyqtardan onlaın-platformaǵa 3000-nan asa ótinim túsken.