Elordadaǵy respýblıkalyq forýmda mektep pen otbasy arasyndaǵy ózara is-qımyldy kúsheıtý usynyldy
ASTANA. KAZINFORM – Elordada ótken respýblıkalyq ata-analar forýmynda «Adal azamat» baǵdarlamasy aıasynda tárbıeniń mazmunyn jańartý jáne mektep pen otbasy arasyndaǵy ózara is-qımyldy kúsheıtý máseleleri talqylandy.
Astana qalasyndaǵy «NURORDA» mektep-lıtseıinde uıymdastyrylǵan jıyn bilim berý júıesindegi tárbıe jumysyn jetildirýge baǵyttaldy. Qatysýshylar «Adal azamat» tujyrymdamasyn óńirlerde tıimdi iske asyrý joldaryn qarastyryp, qundylyqqa negizdelgen tárbıe modelin qalyptastyrý tetikterin talqylady.
Kún tártibinde tárbıe úderisindegi sabaqtastyqty qamtamasyz etý, oqý men tárbıeni birtutas júıe retinde qarastyrý jáne ozyq tájirıbelerdi keńinen engizý máseleleri qamtyldy.
Forýmǵa Senator Bıbigúl Jeksenbaı, Májilis depýtaty, Áleýmettik-mádenı damý komıtetiniń tóraǵasy Ashat Aımaǵambetov, Májilis depýtaty Oljas Quspekov, QR Oqý-aǵartý vıtse-mınıstri Shynar Aqparova, «BІLІM-INNOVATsIıA» halyqaralyq qoǵamdyq qorynyń prezıdenti Darhan Óte, sondaı-aq psıholog-sarapshylar Erjan Myrzabaev pen Baǵdat Ǵalııa qatysty.
Talqylaý barysynda tárbıe máselesiniń qoǵamdaǵy róli ózgerip otyrǵany, ásirese tsıfrlyq ortanyń yqpaly kúsheıgeni atap ótildi. Osy turǵyda ulttyq qundylyqtardy júıeli túrde qalyptastyrýdyń mańyzy erekshe ekeni aıtyldy.
Senat depýtaty Bıbigúl Jeksenbaı balalardyń aqparat keńistiginde qalyptasyp jatqanyn aıtyp, tárbıeniń jańa tásilderine toqtaldy.
– Aqparat beıtarap emes, ol minez ben qundylyqty qalyptastyrady. Sondyqtan balany shekteý emes, durys baǵdarlaý mańyzdy. Aqparattyq ımmýnıtet – búgingi tárbıeniń ózegi. Tárbıe baqylaýdan emes, senimnen bastalady. Bala ekranmen emes, adammen, kontentpen emes, qundylyqpen ósýi tıis. Bul – ulttyq qaýipsizdikpen tikeleı baılanysty másele, - dedi ol.
Jıynda sóz alǵan «BІLІM-INNOVATsIıA» halyqaralyq qoǵamdyq qorynyń vıtse-prezıdenti Erjan Áýbákirov tárbıe úderisindegi ata-ananyń róline erekshe toqtaldy. Onyń aıtýynsha, mektep pen otbasy arasyndaǵy ózara túsinistik pen júıeli baılanyssyz sapaly nátıje kútý qıyn.
– Bala tárbıesi tek mekteptiń mindeti emes. Bul – ata-ana men bilim berý uıymdarynyń ortaq jaýapkershiligi. Memleket bekitken tárbıe standarttary men qundylyqtaryn, sonyń ishinde «Zań jáne tártip» qaǵıdatyn otbasy deńgeıinde júzege asyrý mańyzdy. Sebebi bala eń aldymen qundylyqty otbasynan alady, al mektep ony tolyqtyryp, baǵyt beredi, - dedi ol.
Forým qorytyndysynda tárbıe jumysyn jetildirýge jáne bilim berý ortasynda birizdi júıe qalyptastyrýǵa baǵyttalǵan usynymdar qabyldandy.
Aıta keteıik, buǵan deıin Astanada býllıngtiń aldyn alý máselelerine arnalǵan alǵashqy respýblıkalyq forým ótip, oǵan 300-den astam muǵalim men psıholog qatysqan bolatyn.
