Elordadaǵy N. Tilendıev dańǵylynda ýaqytsha shekteý engiziledi
ASTANA.KAZINFORM — Astana qalasynyń Kólik jáne jol-kólik ınfraqurylymyn damytý basqarmasy 9-20 maýsym aralyǵynda N. Tilendıev dańǵylynyń Saryarqa dańǵylynan Barshyn kóshesine deıingi aralyǵynda joldyń joǵarǵy qabatyn salý jumysyn júrgizedi. Bul týraly Astana qalasynyń ákimshiligi málim etti.
— Osy ýaqytta kólik qozǵalysy eki baǵytta bir jaǵynan kezeń-kezeńimen uıymdastyrylady. Júrgizýshiler men jaıaý júrginshiler júrý baǵytyn aldyn ala josparlaýy jáne yqtımal ózgeristerdi eskerýi qajet. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady, — delingen elorda ákimdiginiń habarlamasynda.
Aıta keteıik, buǵan deıin Turan dańǵylynan Qabanbaı batyr dańǵylyna deıingi ýchaskede Qorǵaljyn tas jolyna jóndeý jumystary júrgiziletinin jazdyq.
