Elordadaǵy Muńaıtpasov stadıony men «Qazaqstan» sport saraıynyń qurylysy qashan aıaqtalady
ASTANA. KAZINFORM — Astana qalasy ákimdiginiń Dene shynyqtyrý jáne sport basqarmasy Qajymuqan Muńaıtpasov atyndaǵy stadıony men «Qazaqstan» sport saraıyn qaıta salýǵa qatysty túsinik berdi.
— Q. Muńaıtpasov atyndaǵy stadıonnyń qurylysyna qatysty qazirgi ýaqytta ǵımarattyń qańqasyn turǵyzý boıynsha qurylys-montaj jumystary júrgizilip jatyr. Arnaýly memlekettik qordan tolyq qarjylandyrý shartymen qurylysty aıaqtaý 2026 jyldyń 1-toqsanynda josparlanyp otyr, — delingen elordalyq basqarmanyń Kazinform agenttigine bergen jaýabynda.
Sonymen qatar, «Qazaqstan» sport saraıyn qaıta qurý máselesi boıynsha 2025 jylǵy 8 sáýirde memlekettik saraptamanyń qorytyndysy alyndy.
— Jergilikti bıýdjettiń kelesi naqtylaýynda (mamyr/maýsym) qurylys-montaj jumystaryna qarajat suralady. Ony aıaqtaý 2026 jyldyń qyrkúıeginde josparlanǵan, — dep atalyp ótken Dene shynyqtyrý jáne sport basqarmasy málimetinde.
Eske sala ketsek, 2021 jyly elordadaǵy Qajymuqan Muńaıtpasov atyndaǵy eski stadıonnyń apattyq jaǵdaıda turǵany aıtyldy.
Al byltyr aqpanda stadıonnyń ornyna jańa jabyq sport kesheni boı kóteretini belgili boldy.
Budan buryn habarlanǵandaı, elordadaǵy «Qazaqstan» sport saraıyn qaıtadan salýǵa qatysty másele birazdan beri jalǵasyp keledi.
2024 jyly kúzde qala ákimi Astanadaǵy osy sport saraıynyń qurylysy qashan aıaqtalatynyn aıtty.
Aıta ketý kerek, «Qazaqstan» sport kesheni alǵash ret 2001 jyly naýryz aıynda ashylǵan.
2007 jyly bul keshen «Barys» hokkeı klýbynyń Qurlyqtyq hokkeı lıgasyna (QHL) qatysýyna baılanysty qaıta jóndeýden ótti jáne «Barys» HK-nyń negizgi arenasy retinde paıdalanyldy. Alaıda, 2018 jyldyń tamyzynda keshendegi basseın jóndeýge jabylyp, 2019 jyldyń sáýirinde sport nysany tolyǵymen jumysyn toqtatqan.