Elordadaǵy Momyshuly dańǵylynyń ýchaskesinde jóndeý jumystary júrgiziledi

ASTANA. KAZINFORM – Astana qalasynyń Kólik jáne jol-kólik ınfraqurylymyn damytý basqarmasy Táýelsizdik dańǵylynan bastap Q.Sátpaev kóshesine deıingi ýchaskede B.Momyshuly dańǵylynda joldiń ústingi qabatyn salý boıynsha jumys júrgizedi. 

Elorda ákimdigi resmı saıtynyń habarlaýynsha, kórsetilgen ýchaske 3-5 tamyz aralyǵynda tolyǵymen jabylady. Bul rette kólik qozǵalysy irgeles kósheler boıynsha uıymdastyrylady. 

Jóndeletin ýchaskede eskertý belgileri, merdiger uıym basshysynyń baılanys aqparaty jazylǵan stendter qoıylady.

Mekeme qala turǵyndary men qonaqtarynan joldaǵy keptelisti boldyrmaý maqsatynda óz marshrýttaryn aldyn ala josparlaýdy suraıdy. 

Eske sala keteıik, buǵan deıin Astanada Turan dańǵylynyń bir bóligi úsh kúnge jabylatynyn habarlaǵan edik.