Elordadaǵy LRT qurylysy: tirekterdi turǵyzý jumysy tolyqtaı aıaqtaldy

ASTANA. KAZINFORM – Astanada jeńil relsti kóliktiń (LRT) 22 shaqyrymdyq estakadalyq jolynyń qurylysyna qarastyrylǵan barlyq 799 tirek salynyp bitti. Oǵan 2,5 myń jumysshy jumyldyryldy. Bul týraly elorda ákimdiginiń resmı saıty CTS-ke silteme jasap habarlaıdy.

Tirekterdi quıý úshin 53,7 myń tekshe metr beton jáne 42 myń tonna armatýra jumsaldy. Tirektiń tómengi bóliginiń eni – 2-2,4 metr, joǵarǵy bóligi – 6,8 metr, bıiktigi estakada jolynyń ótetin jerine baılanysty 5-ten 18 metrge deıin, bir tirektiń ortasha salmaǵy – 200 tonna.

Qazaqstandyq standarttar boıynsha V45 klasyndaǵy M600 markaly beton qoldanylady. Aıta keterligi, V45 klasyndaǵy beton gıdroelektrostantsııalardy, bekinis qurylystaryn, býnkerlerdi, metropolıten, aýyr metallýrgııa kásiporyndaryn, hımııalyq, ǵaryshtyq, qorǵanys zaýyttaryn, atom energetıkasy obektilerin salýda qoldanylady. 

Eske sala keteıik, buǵan deıin City Transportation Systems kompanııasy jóndeý jumysyna baılanysty birneshe avtobýstyń baǵdaryna ózgeris engenin habarlaǵanyn jazǵan edik.