Elordadaǵy qoqys suryptaý zaýytynda jańǵyrtý jumystary qashan aıaqtalady
ASTANA. KAZINFORM — Modernızatsııalaý tamamdalǵan soń, kásiporynnyń qýaty artpaq. Bul jóninde Astana Recycling Plant kompanııasyna qarasty qoqys suryptaý zaýytynyń ınjener-ekologi Qalamqas Kúlimbaeva málimdedi.
Onyń sózinshe, jańǵyrtý jumystary bıyl qazan aıynda aıaqtalmaq.
— Qazir qoqys suryptaý lınııasynyń qýaty — jylyna 200 myń tonna. Qala ósip kele jatqandyqtan, turmystyq qaldyqtar da kóbeıetini túsinikti. Zaýyt táýligine 350-400 tonna qoqysty suryptaı alady. Al kún saıyn ákelinetin qoqystar kólemi — 1200 tonna. Demek, zaýytqa ıgere alatyn mólsherinen úsh ese artyq qaldyq ákelinedi. Bıyl qazan aıynda jańǵyrtý jumystary tamamdalǵan soń, kásiporyn qýaty 20%-ǵa artady. Táýligine 500 tonna, jylyna 250 myń tonna suryptaı alatyn bolady, — dedi Qalamqas Kúlimbaeva.
Sonymen qatar, ol kún saıyn ákelinetin qaldyqtyń tek 20%-y ǵana qaıta óńdeletinin atap ótti. Qoqystyń sapasy tómendemeı, qaıtadan kádege jaraýy úshin plastık, qaǵaz, polıetılen, shyny tárizdi óńdeletin qaldyqtardy tamaqtan bólek jınaýǵa keńes berdi.
Aıta keteıik, buǵan deıin Qazaqstan boıynsha 411 ruqsat etilmegen qoqys polıgony anyqtalǵanyn jazǵanbyz.
