Elordadaǵy qoǵamdyq tamaqtaný oryndarynyń ıelerine órt qaýipsizdigi erejesi túsindirildi
ASTANA. KAZINFORM – Astana qalasynyń Investıtsııalar jáne kásipkerlikti damytý basqarmasy 27 jeltoqsannan bastap aýdandyq ákimdiktermen jáne elordalyq Tótenshe jaǵdaılar departamentimen birlesip, qoǵamdyq tamaqtaný oryndarynda órt qaýipsizdigi talaptaryn saqtaý boıynsha kóshpeli túsindirý is-sharalaryn bastady, dep habarlaıdy qala ákimdiginiń resmı saıty.
Mundaı nysandarda órttiń jıi shyǵýyna elektr symdarynyń qysqa tuıyqtalýy sebep bolady. Bul ǵımarat qasbetteriniń janýyna ákelip, adamdardyń ómiri men múlkine qaýip tóndiredi.
Mamandar mekeme basshylary men qyzmetkerlerine órt qaýipsizdigi talaptaryn, elektr jelileri men jabdyqtardy paıdalaný tártibin, sondaı-aq jaramdy órt sóndirý quraldarynyń mindetti túrde bolýy qajettigin qaperge salady.
Mereke kúnderi qarsańynda pırotehnıkalyq buıymdardy qaýipsiz paıdalaný boıynsha qosymsha túsindirý jumysy júrgizilip jatyr. Osy rette azamattarǵa pırotehnıkany ǵımarattardyń mańynda qoldanýǵa bolmaıtyny jáne belgilengen qaýipsizdik talaptaryn saqtaý qajettigi túsindirildi.
Bul is-sharalar órttiń aldyn alýǵa, sondaı-aq elorda turǵyndary men qonaqtarynyń qaýipsizdigin qamtamasyz etýge baǵyttalǵan.
Buǵan deıin Premer-mınıstrdiń merekede TJM kúshterin órt qaýipsizdigine basa nazar aýdarýǵa shaqyrǵanyn jazǵanbyz.