Elordadaǵy Keleshek mekteptiń oqýshylary tańǵalarlyq robot qurastyrdy

ASTANA. KAZINFORM – Astana qalasyndaǵy №109 Keleshek mekteptiń ustazdary men oqýshylary birlesip, bilim men tehnologııany ushtastyrýdyń erekshe úlgisin kórsetti. Olar adamǵa uqsas robot jasap shyǵardy, dep habarlaıdy elorda ákimdiginiń resmı saıty.

Jańashyl joba avtorlary «Odısseı» dep ataǵan robot qazirgi ýaqytta birneshe erekshe múmkindikterge ıe. Ol kez kelgen suraqqa jaýap bere alady, adamǵa qarap, qolyn kótere alady jáne synyptaǵy oqýshylardy sanaı alady. 

«Bul robot biraz adamdy tań qaldyrady dep senemiz. Balalarymyzdyń qyzyǵýshylyǵy men yntasy bizge úlken kúsh beredi», – deıdi joba jetekshisi, ınformatıka pániniń muǵalimi Dastan Dúısenuly.

Robottyń «Odısseı» dep atalýy da kezdeısoq emes. Ejelgi grek mıfologııasynda Odısseı – danalyǵy men bilimdiligimen tanylǵan keıipker. Sondyqtan oqýshylar bilimge qatysty alǵashqy qadamdarynyń belgisi retinde osylaı ataýdy jón kórgen.

Bul jańashyl bastama jas urpaqtyń ǵylym men tehnologııaǵa qyzyǵýshylyǵyn arttyryp qana qoımaı, bolashaqta úlken jetistikterge jeteleıtini sózsiz.

Aıta keteıik, oqýshy aýany ylǵaldandyratyn robot oılap tapty.