Elordadaǵy qatty qaldyqtar polıgonyndaǵy órtti sóndirý jumystary áli júrip jatyr
ASTANA. KAZINFORM - Elordanyń Baıqońyr aýdanyndaǵy qatty turmystyq qaldyqtar polıgonynan shyqqan órtti sóndirý jumystary táýlik boıy úzdiksiz júrgizilip jatyr, dep habarlaıdy QR Tótenshe jaǵdaılar mınıstrliginiń baspasóz qyzmeti.
Órtti sóndirýdiń tıimdiligin arttyrý maqsatynda negizgi kúshter men quraldar jumyldyrylǵan eki ýchaske quryldy.
Sonymen qatar órt oshaqtaryn oqshaýlaý jáne jalynnyń odan ári taralýyna jol bermeý maqsatynda polıgon aýmaǵyn ınertti materıalmen jabý boıynsha ınjenerlik jumystar júrgizilip jatyr. Qazirgi ýaqytta polıgonǵa 14,85 myń tonnaǵa jýyq ınertti materıal jetkizildi.
Jumystardyń júrgizilýi qatty tútinge, jınalǵan qaldyqtardyń turaqsyz bolýyna baılanysty qıyndap ketti. Bul arnaıy tehnıkanyń qozǵalysyn shektep, manevr jasaýyna kedergi keltirip otyr.
Sýmen úzdiksiz qamtamasyz etý órt gıdrantynan sý tasymaldaıtyn órt sóndirý avtotsısternalary men sý tasıtyn arnaıy kólikter arqyly júzege asyrylý ústinde.
Órtti sóndirýge TJD men JAO 120-ǵa jýyq jeke quramy jáne 150 tehnıkasy jumyldyrylǵan.
Jaǵdaı TJM-niń turaqty baqylaýynda.
Osyǵan deıin Óskemende kópqabatty úıden shyqqan órt kezinde 15 adam qutqarylǵany týraly jazdyq.
