Elordadaǵy ǵımarattardyń biriniń qasbetine jańa mýral salyndy
ASTANA. KAZINFORM – Elordanyń Saraıshyq aýdanynda Qýanyshbaev kóshesi, 11/4 mekenjaıyndaǵy ǵımarattyń qasbetine tabıǵattyń jańarýy men qalanyń kórkem kelbetin beıneleıtin «Qyz ósse, eldiń kórki» atty jańa mýral salyndy, dep habarlaıdy qala ákimdiginiń resmı saıty.
Qabyrǵaǵa salynǵan týyndy qalalyq keńistiktiń maýsymdyq jańarýy men óńirdiń mádenı bolmysyn aıshyqtaıtyn tujyrymdamaǵa negizdelgen.
Gúldermen kómkerilgen qyz balanyń beınesi kóktemniń kelýin, tabıǵattyń qaıta túlep, jańarýyn jáne dalaǵa tán úılesimdilikti bildiredi.
Kompozıtsııada keıipkerdiń nazary kóshe keńistigi men LRT jelisine aýǵan. Bul – qala ınfraqurylymynyń damýyn syrttaı baqylap, aldaǵy oń ózgeristerdi kútýiniń sımvoldyq kórinisi. Osy arqyly týyndyda mádenı mazmun men zamanaýı ýrbanızatsııa úderisteriniń baılanysy kórinis tapqan.
Mundaı kórkem jobalar aýdannyń estetıkalyq kelbetin arttyrýǵa baǵyttalǵan.
Ideıa avtory ári mýraldyń sýretshisi – Temirlan Ábenov.
Eske sala keteıik, buǵan deıin Astanada demalys kúnderi aýyl sharýashylyǵy jármeńkesi ótetinin habarlaǵanbyz.
