Elordadaǵy emhanada mı qyzmetin zertteıtin apparat iske qosyldy
ASTANA. KAZINFORM – Elordadaǵy №2 qalalyq emhanada elektroentsefalografııa (EEG) kabıneti ashyldy. Jańa apparat mıdyń fýnktsıonaldyq jaǵdaıyn anyqtaýǵa arnalǵan dıagnostıkalyq zertteýler júrgizýge múmkindik beredi, dep habarlaıdy Astana qalasy ákimdiginiń resmı saıty.
Atalǵan zertteý únemi bas aýrýyna shaǵymdanatyn, esinen taný, qurysý belgileri bar, jaraqattan keıingi asqynýlardy bastan ótkergen azamattarǵa, sondaı-aq balalardyń sóıleý damýynyń kesheýildeý jaǵdaılarynda júrgiziledi.
– Elektroentsefalografııa – ınvazıvti emes, aýyrtpalyqsyz dıagnostıkalyq ádis. Zertteý kezinde bastyń teri qabatyna arnaıy elektrodtar qoıylyp, mı neırondarynyń belsendiligi tirkeledi. Bul apparattyń basty artyqshylyǵy – uıqy buzylystary, epılepsııa, operatsııadan keıingi jáne jaraqat saldarlary, mı isikteri men qabyný protsesteri sııaqty túrli patologııalardy anyqtaýǵa múmkindik berýi, - dedi emhananyń dáriger-nevropatology Gúlbarshyn Sadýova.
Dıagnostıkalyq tekserýden kúndizgi ýaqytta – tańǵy 9:00-den keshki 18:00-ge deıin ótýge bolady. Sonymen qatar 10 saǵatqa sozylatyn túngi zertteý de qarastyrylǵan, ol 22:00-den 08:00-ge deıin júrgiziledi. Bul qaýipsiz tekserý eresekterge de, balalarǵa da qoljetimdi.
Dárigerdiń aıtýynsha, túngi EEG tekserýi tek medıtsınalyq kórsetkishter boıynsha jáne terapevt, pedıatr, sondaı-aq nevrolog nemese nevropatolog joldamasymen ǵana júrgiziledi.
Atalǵan protsedýra mindetti áleýmettik medıtsınalyq saqtandyrý (MÁMS) júıesine qatysatyn azamattar úshin tegin. Al saqtandyrylmaǵan turǵyndar ony aqyly negizde óte alady. Kabınette joǵary dáldik pen aqparattylyqty qamtamasyz etetin eki apparat ornatylǵan. Sondaı-aq bólme patsıent pen ony ertip kelgen adamǵa qolaıly jaǵdaı jasaı otyryp jabdyqtalǵan.
Eske sala keteıik, buǵan deıin Astanada jańa emhanalar ashylyp, medıtsınalyq qyzmet tsıfrlandyrylǵanyn jazǵan edik.