Elordadaǵy ekinshi áýejaıdyń orny naqtylandy ma – ákimdik resmı jaýap berdi
ASTANA. KAZINFORM – Buqaralyq aqparat quraldarynda Astanada ekinshi áýejaıdyń ornalasatyn orny anyqtalǵany týraly aqparattyń taralýyna baılanysty málimet shyndyqqa saı kelmeıdi, dep habarlaıdy elorda ákimdiginiń resmı saıty.
Málimette kórsetilgen «Elordadan soltústik-batys baǵytynda - Shortandy kenti baǵytyna qaraı, Astana - Kókshetaý tasjolynyń boıyndaǵy aýmaq» Astana qalasynyń ákimshilik shekarasyna kirmeıdi. Osyǵan baılanysty atalǵan aýmaq ekinshi áýejaıdyń orny retinde Astananyń Bas josparynda qarastyrylýy múmkin emes.
Búgingi kúni ekinshi áýejaıdyń naqty ornalasatyn orny boıynsha túpkilikti sheshim qabyldanǵan joq. Astana qalasynyń Bas josparyna túzetýler engizý aıasynda tek yqtımal perspektıvalyq baǵyttar ǵana qarastyrylýda.
«2035 jylǵa deıingi Astana qalasynyń Bas josparyna ózgerister men tolyqtyrýlar engizý» jobasy elordalyq máslıhat depýtattarynyń maquldaýynan keıin Qazaqstan Respýblıkasy Úkimetiniń kelisýine joldanatyn bolady.
Buqaralyq aqparat quraldarynyń ókilderi men áleýmettik jeli paıdalanýshylarynan tek resmı jáne tekserilgen aqparatqa súıenýlerin suraımyz.
Naqty aqparat alý úshin «Astana qalasynyń Sáýlet, qala qurylysy jáne jer qatynastary basqarmasy» MM-ne júginýge bolady.
Eske sala keteıik, buǵan deıin Astananyń ekinshi áýejaıy qaı aýdanda salynýy múmkin ekenin jazǵan edik.
