Elordadaǵy búldirshinderge arnalǵan Prezıdenttik shyrshaǵa 200 bala qatysty

ASTANA. KAZINFORM – Astanadaǵy Q.Qýanyshbaev atyndaǵy qazaq ulttyq mýzykalyq drama teatrynda búldirshinderge arnap Prezıdenttik shyrsha toıy ótti, dep habarlaıdy elorda ákimdiginiń resmı saıty.

Jańajyldyq baǵdarlamada qonaqtar aýqymdy ınteraktıvti spektakldi tamashalady. Balalar basty keıipker Azamatpen birge «Bolashaqta kim bolý kerek jáne qandaı adam bolý kerek?» degen mańyzdy suraqqa jaýap izdedi.

– Búgingi shyrsha «Adal azamat» birtutas tárbıe baǵdarlamasy aıasynda ótkizilip jatyr. Bul baǵdarlamada balalar, eń bastysy, ózimizdiń ulttyq qundylyqtarymyzdy boıyna kóbirek sińiredi. Qoıylym jas urpaqty adaldyqqa, ádildikke jáne tazalyqqa baýlıdy. Oqıǵalar jelisinen jas jetkinshekterimiz túrli mamandyq ıelerine qurmet pen zań men tártipke baǵynýshylyq qaǵıdalaryn jadyna túıip júretin bolady degen oıdamyn. Teatr sahnasynda balalar ózderine unaıtyn ertegiler men mýltfılmderde oqyp, kórip júrgen Taýsoǵar, Er Tóstik, jáne basqa da keıipkerlermen kezdesedi, - dedi Astana qalasy Bilim basqarmasynyń basshysy Qasymhan Senǵazyev.

Onyń aıtýynsha, jańajyldyq merekege elordalyq 200 bala qatysty. Olardyń qatarynda oqýda joǵary jetistikke jetken oqýshylar, kópbalaly otbasy balalary, ata-anasynyń qamqorlyǵynsyz qalǵan jáne az qamtylǵan otbasynan shyqqan búldirshinder bar.

– Ulymyz ekeýimiz Prezıdenttik shyrshaǵa birinshi ret qatysyp turmyz. Men – «Osobye prazdnıkı» qoryndaǵy erekshe balanyń anasymyn. Balam – Rýslan Ǵızatov 13 jasta. Ol – kásibı sýretshi, halyqaralyq baıqaýlardyń jeńimpazy. Atalmysh is-sharaǵa Astana qalasy ákimdiginen shaqyrtý alǵanymyzǵa qýanamyz. Búgingi shyrshaǵa kelgen baldyrǵandardyń bári baqytqa bólengen shyǵar dep oılaımyn. Osyndaı tamasha kún syılaǵany úshin uıymdastyrýshylarǵa alǵysymdy bildiremin, - dedi Astana turǵyny Sáýle Muhamedjanova.

Spektaklde zamanaýı vızýaldy effektiler, bı nómirleri jáne zalmen belsendi ózara árekettesý biriktirilip, naǵyz jańajyldyq ǵajaıyp atmosfera kórinis tapty. Mereke sońynda barlyq balaǵa jańajyldyq syılyqtar berildi.

Eske sala keteıik, buǵan deıin Astanadaǵy Prezıdenttik shyrshaǵa elimizdiń ár óńirinen 100-den astam bala qatysqanyn jazǵanbyz.