Elordadaǵy beınebaqylaý júıesi turǵyndardyń jeke ómirine qol suqpaıdy
ASTANA. KAZINFORM – Astana Smart City ahýaldyq ortalyǵynyń basqarýshy dırektory Aıbek Ahmetbekov beınebaqylaý júıesi turǵyndardyń jeke ómirine qol suqpaıtynyn jáne tek qoǵamdyq qaýipsizdikti qamtamasyz etýge baǵyttalǵanyn aıtty.
Onyń sózinshe, Astana Smart City jobasy aıasyndaǵy ahýaldyq ortalyq eń aldymen qala turǵyndarynyń qaýipsizdigin qamtamasyz etýge jáne qalalyq qyzmetterdiń jumysyn jetildirýge baǵyttalǵan.
– Árıne, joq. Astana Smart City jobasy aıasyndaǵy ahýaldyq ortalyq eń aldymen turǵyndardyń qaýipsizdigin qamtamasyz etýge jáne qalalyq qyzmetterdiń jumysyn jaqsartýǵa baǵyttalǵan. Bizde tek derbestendirilmegen derekter saqtalady, ıaǵnı jeke derekter jınalmaıdy. Bul jerde erekshe atap ótkim keletini – qalanyń óziniń qorǵalǵan tsıfrlyq derekterdi óńdeý ortalyǵy bar. Onda tek derbestendirilmegen málimetter saqtalady. Eger qandaı da bir oqıǵa tirkelip, quqyq qorǵaý organdaryna jeke derekter qajet bolsa, onda olar zańnamada belgilengen tártippen tıisti suraý salý arqyly beriledi. Biz tek oqıǵany tirkep, ony jaýapty organdarǵa joldaımyz. Al ári qaraı bul máselemen quqyq qorǵaý organdary aınalysady, – dedi Aıbek Ahmetbekov Astana qalasynyń kommýnıkatsııalar qyzmeti alańynda ótken brıfıngte.
Sondaı-aq ol beınekameralar quqyq buzýshylyqty tirkegennen keıingi áreket etý tártibin túsindirdi.
– Árbir oqıǵa boıynsha naqty algorıtm qarastyrylǵan jáne oǵan jaýapty qyzmetter belgilengen. Mysaly, eger azamat qoqysty belgilenbegen jerge tastasa nemese zańsyz qoqys úıindisi anyqtalsa, bul máselemen Ahýaldyq ortalyǵynda jumys isteıtin Polıtsııa departamentiniń qyzmetkeri aınalysady. Ol resmı túrde oqıǵa kartochkasyn tirkeıdi, sodan keıin aýmaqtyq tıesiligine qaraı aýdan ákimdigin habardar etedi jáne ákimshilik materıaldardy rásimdeý jumystary bastalady. Oqıǵa ári qaraı jedel basqarý ortalyǵyna joldanyp, jaýapty qyzmetter birlesip jumys júrgizedi. Ahýaldyq ortalyqtyń artyqshylyǵy barlyq oqıǵa birden tirkelip, tıisti memlekettik organdarǵa jedel túrde jetkiziledi, – dedi ol.
Buǵan deıin Astanada 60 myńnan astam kamera qala tazalyǵyn baqylaıtynyn jazǵanbyz.
