Elordadaǵy Backstreet Boys kontsertine 45 elden 12 myń týrıst keldi
ASTANA. KAZINFORM — 21 qyrkúıek kúni «Astana Arena» stadıonynda tarıhı is-shara ótip jatyr. Elordada álemge áıgili Backstreet Boys toby óner kórsetti, dep habarlaıdy qala ákimdiginiń resmı saıty.
Kontsertke Germanııa, Polsha, Frantsııa, Túrkııa, Fınlıandııa, Lıtva, Estonııa, Chehııa, Serbııa, Grekııa, Ázerbaıjan, Reseı, Ózbekstan jáne taǵy basqa elderdi qosa alǵanda, 45 memleketten 12 myńnan astam týrıst arnaıy keldi.
Keshtiń uıymdastyrýshysy — «Astana Kontsert» kompanııasy Total White dress-kodyn jarııalap, is-sharaǵa erekshe birlik pen stıl berdi.
Áleýmettik jelilerde #GetReadyWithMe trendi keń taralyp, jankúıerler balalyq shaqtaǵy kýmırlerin qarsy alýǵa qalaı daıyndalǵanyn kórsetti.
Backstreet Boys kontserti Astanadaǵy álemdik juldyzdardyń kezekti qoıylymy ǵana emes, elorda tarıhyna engen aýqymdy mádenı oqıǵaǵa aınaldy. Álemdik mýzykalyq tarıhtaǵy eń tabysty pop-toptardyń biri sanalatyn Backstreet Boys 130 mıllıonnan astam albom satty.
Astanadaǵy kontsert olardyń álemdik týrnesiniń bir bóligi boldy. Al 2025 jyly top Las-Vegastaǵy áıgili The Sphere kesheninde rekord ornatyp, bir kúnniń ishinde 500 myńnan astam bılettiń satylýymen tarıhtaǵy eń kóp satylǵan shoýǵa qol jetkizdi.
Buǵan deıin Astanadaǵy Backstreet Boys kontsertine múmkindigi shekteýli jandar qatysqanyn jazǵan edik.