Elordadaǵy avtobýs apatynyń sebebi belgili boldy

ASTANA. KAZINFORM — Elordada apatty bolǵan qyzmettik avtobýstyń júrgizýshisi rólge ıe bola almaı qalǵan.

— Mercedes markaly qyzmettik avtobýstyń júrgizýshisi Qabanbaı batyr dańǵylymen júrip kele jatyp, burylys jasaý kezinde rólge ıe bola almaı, kólik jol jıegine shyǵyp ketken. Salonda bolǵan jolaýshylar medıtsınalyq mekemege jetkizildi. Jol-kólik oqıǵasy saldarynan qaza bolǵandar joq. Atalǵan derek boıynsha tekseris júrgizilip jatyr, — delingen qalalyq Polıtsııa departamentiniń Kazinform agenttigine bergen jaýabynda.

Aıta keteıik, taraǵan vıdeoǵa qaraǵanda, avtobýs qalalyq marshrýtta júrgen kólikke uqsamaıdy. 

Elordalyq densaýlyq saqtaý basqarmasy atalǵan jol-kólik oqıǵasy saldarynan 14 adam jedel járdem arqyly qalalyq kópsalaly statsıonarlarǵa, sondaı-aq Ulttyq shuǵyl medıtsına úılestirý ortalyǵyna jetkizilgenin habarlady. Zardap shekkenderdiń birqatary ambýlatorlyq emdeýge jiberildi, al qalǵandary qosymsha tekserýden ótip jatyr. Zardap shekkenderdiń basym bóligi jeńil túrde jaralanǵan.