Elordadaǵy Atyraý kópirinde Ulttyq dombyra kúnine arnalǵan mádenı is-sharalar ótti
ASTANA. KAZINFORM - 6 shilde kúni Astananyń júreginde, Atyraý kópirinde Ulttyq dombyra kúnine arnalǵan aýqymdy mádenı shara ótti, dep habarlaıdy Astana ákimdiginiń baspasóz qyzmeti.
Bul oqıǵa dástúr men zamanaýılyqty, dybys pen beıneni, jady men shabytty toǵystyrdy. Ol qazaq halqynyń ulttyq murasyna jáne rýhanı sımvolyna degen qurmettiń kórinisi boldy.
Memleket basshysy bıyl elorda kúni men Ulttyq dombyra kúni tuspa-tus kelgenin atap ótip, bul kúnniń mańyzdylyǵyna toqtaldy: «Dombyra – ult bolmysy, halyq qazynasy. «Qazaq – naǵyz qazaq emes, naǵyz qazaq – dombyra» dep beker aıtylmaǵan. Ásirese, óskeleń urpaqtyń dombyraǵa degen yqylasy erekshe. Jastar tól mádenıetimizdi tereń túsinip, salt-dástúrimizge qurmetpen qaraıdy. Bul – óte jaqsy úrdis. Óıtkeni ata-babalarymyzdyń mádenı murasyn kózdiń qarashyǵyndaı saqtaý – naǵyz otanshyldyqtyń kórinisi. Otanǵa súıispenshilik – memlekettiligimizdiń temirqazyǵy».
Resmı derekterge sáıkes, sharaǵa 20 000-nan astam qala turǵyny men qonaqtar qatysty. Bul — qazaqstandyqtardyń óz tarıhy men mádenı murasyna degen shynaıy qurmetiniń aıǵaǵy. Kópshilik qatysýy men kórermenderdiń belsendiligi sharanyń basty jetistikteriniń biri boldy.
Merekeniń negizgi nazaryn ózine aýdarǵan — dombyra pishinindegi erekshe art-ınstallıatsııa. Bul jaı ǵana sándik element emes, ınstallıatsııa ishine kirgen qonaqtar «Altyn qordan» alynǵan ańyzǵa aınalǵan kúılerdi estip, erekshe dybystyq atmosferaǵa endi. Jumsaq jaryq pen akýstıka arqyly babalardyń únin estigendeı áser qaldyrdy.
Іs-shara baǵdarlamasy kelesi baǵyttardy qamtydy:
Kúıshi men seriler sherýi: Qurmanǵazy, Dına Nurpeıisova, Aqan seri syndy tulǵalardyń obrazyndaǵy ártister kópir boıymen júrip, qonaqtarmen tildesti. Bul sherý urpaqtar arasyndaǵy beıresmı dıalogqa aınaldy.
Dombyra sheberhanasy: Balalar men jasóspirimder dombyra tartýdy úırenip, ǵasyrlar boıy urpaqtan urpaqqa jetken ónermen tanysty.
Interaktıvti aımaqtar: «Kúıdi tap», dombyra-pazl jınaý, vıktorınalar men mýzykalyq oıyndar syndy belsendilikter kez kelgen adamǵa sharaǵa atsalysýǵa múmkindik berdi.
«Jelmen jetken ún» ınstallıatsııasy: Kúılerdiń ataýlary men kúıshilerdiń esimderi jazylǵan lentalar erekshe kórkem ekspozıtsııany qurady.
Uly dombyrashylar arhıvi (JI arqyly): Qurmanǵazy, Dına Nurpeıisova, Nurǵısa Tilendıev jáne basqa da tulǵalardyń obrazdary jasandy ıntellekt kómegimen LED ekranda qaıta jandandy. Bul — jańa tehnologııalar arqyly tarıhı murany saqtaý men nasıhattaýdyń naqty úlgisi.
«100 kitap» jobasy»: Dombyraǵa arnalǵan elektrondy kitap kórmesi.
Dombyra kıno: Aspan astynda, qazaq aýyly stılinde uıymdastyrylǵan kınoaımaqta kórermender qazaq mýzykasyna arnalǵan fılmderdi tamashalady.
Merekelik kontsert: Amfıteatr sahnasy kúı men halyq ánderine tolyp, ǵasyrlar boıǵy mýzykalyq dástúrdi qaıta tiriltti.
Mundaı formattaǵy is-shara Astanada alǵash ret ótkizildi. Ejelgi dástúrler men zamanaýı tehnologııalardyń toǵysýy — mádenı muranyń sandyq dáýirde de ómirsheń ári ózekti bola alatynyn kórsetti.
Sharany uıymdastyrǵan — Astana qalasynyń mádenı is-sharalardy ótkizý dırektsııasy. Bul — memleket tarapynan qazaq mádenıetin saqtaý men dáripteýge jasalǵan naqty qoldaý.
Bul mereke naǵyz keshegi men erteńniń arasyndaǵy kópirge aınaldy. Dástúrli óner men zamanaýılyqtyń ushtasýy árbir adamǵa óz túp-tamyrymen qaýyshýǵa múmkindik berdi.
Aıta keteıik, búgin Ortalyq Azııa men Eýrazııa keńistigindegi mańyzdy saıası, ekonomıkalyq jáne mádenı ortalyqqa aınalǵan elordamyz – Astana kúni.
