Elordada dárigerler, kommýnaldyq qyzmetkerler jáne ustazdar birlesip aǵash ekti
ASTANA. KAZINFORM — Astanada «Astana Tazalyq» JShS-niń bastamasymen, qalalyq kásiptik-tehnıkalyq kolledj jáne Ulttyq shuǵyl medıtsına úılestirý ortalyǵymen birlesip aǵash otyrǵyzý ekologııalyq aktsııasy ótti.
Mekemeniń baspasóz qyzmetiniń málimetinshe, is-shara «Taza Qazaqstan» respýblıkalyq ekologııalyq aktsııasy aıasynda uıymdastyrylyp, ekologııalyq mádenıetti qalyptastyrý men qalalyq ortany abattandyrý baǵytyndaǵy kezekti mańyzdy qadamǵa aınaldy.
Aktsııa túrli sala ókilderin biriktirdi — kommýnaldyq qyzmetkerler, oqytýshylar, stýdentter, sondaı-aq dárigerler men shuǵyl medıtsına júıesiniń mamandary. Qatysýshylar elordany kógaldandyrý isine óz úlesterin qosyp, qoǵamdaǵy ekologııalyq jaýapkershilikti arttyrýdyń úlgisin kórsetti.
Іs-sharanyń mańyzdy bóligi retinde úsh uıym arasynda yntymaqtastyq týraly memorandýmǵa qol qoıyldy. Bul qujat ekologııalyq mádenıetti damytýǵa, áleýmettik jaýapkershilikti arttyrýǵa jáne tabıǵatqa uqypty qaraý qundylyqtaryn ilgeriletýge baǵyttalǵan.
Mundaı bastamalarda kommýnaldyq qyzmet salasy qyzmetkerleriniń róli erekshe. Olar kún saıyn qala tazalyǵy men tártibin qamtamasyz etip, turǵyndar úshin jaıly ári qaýipsiz orta qalyptastyrady. Saladaǵy jetekshi kásiporyndardyń biri — «Astana Tazalyq» JShS, munda 2000-nan astam qyzmetker eńbek etedi jáne 500-den astam arnaıy tehnıka jumyldyrylǵan.
— Mundaı aktsııalar — tek qalany kógaldandyrýǵa qosylǵan úles qana emes, sonymen qatar ekologııalyq mádenıetti qalyptastyrýdyń mańyzdy tetigi. Ártúrli sala ókilderiniń bir maqsatta birigýi qoǵamda jańa jaýapkershilik mádenıetin qalyptastyrady, — dedi «Astana Tazalyq» JShS bas dırektory Albert Esalıev.
Óz kezeginde medıtsına salasynyń ókilderi de ekologııalyq aktsııalardyń mańyzdylyǵyn atap ótti.
— Qorshaǵan ortanyń tazalyǵy — halyq densaýlyǵynyń mańyzdy faktory. Dárigerler qaýymy úshin mundaı aktsııalarǵa qatysý — kásibı ári azamattyq mindet, — dedi Ulttyq shuǵyl medıtsınany úılestirý ortalyǵynyń Basqarma tóraǵasy Erjan Ádilbekov.
Al bilim berý salasynyń ókilderi mundaı is-sharalardyń jastardyń ekologııalyq sanasyn qalyptastyrýdaǵy róline nazar aýdardy.
— Mundaı bastamalar stýdentter úshin úlken tárbıelik mánge ıe. Jastar tabıǵatty qorǵaýdyń mańyzyn is júzinde túsinip, qorshaǵan ortaǵa jaýapkershilikpen qaraýdy úırenedi, — dedi kásiptik-tehnıkalyq kolledj dırektorynyń mindetin atqarýshy Janna Baımuratova.
Іs-shara barysynda qatysýshylar 100-den astam aǵash kóshetterin otyrǵyzyp, elordanyń jasyl qoryn arttyrýǵa jáne ekologııalyq jaǵdaıdy jaqsartýǵa úles qosty.
«Taza Qazaqstan» respýblıkalyq aktsııasy keń aýqymda jalǵasyp jatyr. El boıynsha kógaldandyrý, aýmaqtardy tazartý jáne ekologııalyq aǵartý baǵytyndaǵy bastamalar júzege asyrylyp, mıllıondaǵan azamattardy tabıǵatty qorǵaý men tazalyq ıdeıasy tóńireginde biriktirip otyr.
Osyǵan deıin Memleket basshysy «Taza Qazaqstan» respýblıkalyq ekologııalyq aktsııasyna qatysqanyn jazǵanbyz.
