Elordada zııatkerlik menshik quqyǵyn júzege asyrýdyń keleli máselelerine arnalǵan halyqaralyq semınar ótip jatyr
STANA. Maýsymnyń 7-si. QazAqparat /Jasulan Amanbaıuly/ - Búgin Astanada Qarjy mınıstrliginiń Kedendik baqylaý komıtetinde «Zııatkerlik menshik quqyqtaryn saqtaýdyń kedendik sharalary» taqyrybynda halyqaralyq semınar jumysy bastaldy,
dep habarlaıdy QazAqparat.
«Qazaqstannyń Kedendik odaqqa kirip otyrǵan shaǵynda zııatkerlik menshik máselesine qatysty máselelerdi sheshýdiń mańyzy arta túsip otyr. Zııatkerlik menshikti qorǵaýdyń tıimdi júıesin qurý - elimizdiń qarjylyq áleýetine, otandyq óndirýshilerdiń básekege qabilettiligine tikeleı áser etedi. Osy mindetterdi atqarýda kedendik organdardyń alar orny erekshe», deıdi Kedendik baqylaý komıteti tóraǵasynyń orynbasary Ómirzaq Beıispekov.
Amerıkanyń halyqaralyq damý jónindegi agenttiginiń (USAID) qoldaýymen zııatkerlik menshik quqyǵyn júzege asyrýdyń keleli máselelerin talqylaýǵa arnalǵan halyqaralyq semınarǵa Tájikstan, Qyrǵyzstan jáne Estonııa elderiniń kedendik baqylaý salasynyń mamandary qatysýda.
«Eger biz zańnamany durys qalyptastyryp, quqyq ıelenýshilerge, ınnovatorlarǵa, óndirýshi kásiporyndarǵa kózqarasymyzdy ózgertpesek, eldiń ınvestıtsııalyq tartymdylyǵy, ekonomıkalyq damýy tejele beredi», deıdi Amerıkanyń halyqaralyq damý jónindegi Agenttiginiń sarapshysy Malıka Qoıanbaeva.
Úsh kúndik semınar barysynda kedendik organ qyzmetkerleri zııatkerlik menshik jónindegi daýlardyń quqyq qoldanysynyń ózekti máselelerin saralap, zııatkerlik quqyǵynyń jaı-japsaryna tereń taldaýlar jasaıdy, Ortalyq Azııa jáne Eýropalyq Odaq memleketterinde menshikti quqyqtyq qorǵaý aıasyndaǵy zańnamalyq qoldanysyna baılanysty jasalyp jatqan sharalarmen tanysady.
