Elordada «Jyr alyby – Jambyl» ádebı revıýi ótti

Ádebı revıý Jambyl Jabaevtyń 175 jyldyǵyna arnalǵan aýqymdy is- sharalar qatarynda ótti. Maýsymnyń 22-si – aqyn ómirinde de, halyq tarıhynda da kóptegen maǵynalyq, belgilik reńk bar kún. Birinshiden, bul Eske

alý jáne aza tutý kúni, sebebi, 80 jyl buryn, 1941 jyly adamzat tarıhyndaǵy eń qandy soǵys bastaldy.

Osy soǵystyń tarıhyndaǵy eń qaıǵyly betterdiń biri – Lenıngrad qursaýy edi. 80 jyl buryn Uly dala elinen qala qorǵaýshylaryna «Lenıngradtyq órenim!» atty jalyndy sálemin joldaǵan qos ǵasyrdyń kýágeri Jambyl aqyn 1945 jyldyń 22 maýsymynda 99 jasynda ómirden ozdy.

Tuńǵysh Prezıdentimiz N.Á.Nazarbaev: «Jambyl – týǵan halqynyń kúngeıi men kóleńkesin tarıhı talǵam tarazysyna salyp, shabyttyń shyrqaý bıigine kótergen aqyn. Halyq taǵdyrynyń kúlli arnalary men tamyrlaryn sátti ushtastyra bilgendikten, «halyqtan shyqqan dana aqyn» degen ataqqa ıe bolǵan. Bul – shyndap kelgende, halyqtyń dara týǵan perzentine berer eń joǵary baǵasy. Qazaq halqy barda, onyń tili men dini aman turǵanda, adaldyq pen adamdyqtyń, ádilettilik pen izgiliktiń jyrshysy –Jambyl da máńgi jasaı bermek», - degen edi.

2021 jylǵy 22 aqpanda Memleket basshysy Q.K.Toqaev «Jambyl Jabaevtyń 175 jyldyq mereıtoıyn daıyndaý jáne ótkizý jónindegi memlekettik komıssııa qurý týraly» arnaıy Jarlyq qabyldaǵan bolatyn.

Aqyn mereıtoıyn atap ótýdiń resmı sheshimi ústimizdegi jyldyń 26 aqpanynda jarııalandy.

Іs-sharany ashqan Elbasy kitaphanasynyń dırektory Baqytjan Temirbolat, ǵasyr Gomeri atanǵan uly aqyn Jambyl Jabaevtyń 175 jyldyq mereıtoıy el táýelsizdiginiń 30 jyldyǵymen tuspa-tus kelgendigin atap ótti. « 90 jyldary táı-táı basqan jas memleket úshin aqynnyń 150 jyldyǵyn atap ótý –egemendiktiń belgisi edi... Jyraýdyń áli kúnge deıin ózektiligin joǵaltpaǵan shyǵarmalary 50-ge jýyq jahan tiline aýdarylǵan. Esimi álem tarıhyna altyn árippen oıylǵan aqynnyń shyǵarmashylyǵy – qazaq halqynyń murasy. Ony saqtap, bolashaq urpaqqa jetkizý – ortaq boryshymyz bolmaq. Búgingi kezdesý qazaq halqynyń uly danasy Jambyl Jabaevtyń rýhanı-mádenı murasyn saqtaý isine óz úlesin qosýy tıis« , - dep atap ótti ol .

– Qazaqtyń qara óleńin kıe tutqan, júreginiń túbinen qaınap shyqqan asyl jyrlarymen halyqtyń mahabbatyna bólengen Jambyl babamyzdiń esimi elordamyz úshin erekshe ystyq. Máselen, uly aqynnyń qurmetine turǵyzylǵan bul eskertkish astananyń 2008 jyly, 10 jyldyǵyn atap ótý tusynda boı kóterip, bas qalanyń sanaýly ádebı eskertkishteri qataryna kirdi. Nur-Sultan qalasyndaǵy Jambyl Jabaev kóshesi men Jambyl Jabaev atyndaǵy №4 mektep-gımnazııa da jyrshynyń qurmetine ataý alǵan. Onyń shyǵarmashylyǵy – HH ǵasyr ádebıetiniń asyl marjany, - dedi Nur-Sultan qalasy ákiminiń orynbasary Ermek Qızatov.

– Jambyl babamyz halyqtyń aqyny bolǵan soń, óz basyna túsken qıyndyqtarǵa qaramastan, el tarıhynyń syn sátterinde, ásirese soǵys jyldarynda óleń-jyrlarymen ulttyń rýhyn, ata-baba qanymen berilgen batyrlyǵyn oıatýǵa tyrysqan. Jyraýdyń balasy Alǵadaı soǵysta kóz jumsa, maıdanǵa attanǵan ekinshi perzenti Іzbasar habarsyz ketken. Qartaıǵan shaǵynda mundaı qaıǵymen betpe-bet kezdesken Jambyl balalarynyń esimin óleńderine qosyp, halyqtyń da júrek jarasyn jyr joldarymen emdeıdi. Bir emes, qos ǵasyrdyń tarıhynan syr shertken aqynnyń shyǵarmashylyǵy ult úshin qashan da ózekti, qashan da qundy, - dedi QR Jazýshylar odaǵynyń múshesi Erqoja Tilepberdıev.

Ádebı revıý barysynda aqynnyń óshpes óleńderi men ánderi shyrqaldy.

Qatysýshylarǵa soǵys jáne tyl ardagerleri úndeý joldap, Qazaqstannyń qazirgi jazýshylary men aqyndary sóz sóıledi.

Olardyń biri, Uly Otan soǵysynyń 101 jasar ardageri Abdýrahman Safarov fronttaǵy estelikterimen bólisip, jastarǵa batasyn berdi.

Aqynnyń ómiri men shyǵarmashylyǵyna arnalǵan sharany Almaty oblysyndaǵy Jambyl Jabaevtyń ádebı-memorıaldyq mýzeıi týraly beınerolık pen Elbasy kitaphanasy, Qazaqstan Respýblıkasy Mádenıet jáne

sport mınıstrligi arhıvinen alynǵan beınematerıaldar tolyqtyrdy.