Elordada jyly aıaldamalar qaıda ornatylady
ASTANA. QazAqparat - Astana qalasynyń ákimi Baqyt Sultanov e.gov.kz">e.gov.kz portalyndaǵy ınternet-konferentsııada qala turǵyndarynyń kókeıkesti suraqtaryna jaýap berdi, dep habarlaıdy QazAqparat qala ákimdiginiń saıtyna silteme jasap.
Kezdesý barysynda forýmǵa qatysýshylar qurylys, qoǵamdyq kólikterdiń jumysy, jergilikti bıýdjettiń tolyqtyrylýy týraly ózekti máselelerdi talqylady.
Qala turǵyny Erlan Sákenov jyly aıaldamalardyń qaıda jáne qashan ornatylatyny týraly surady.
«Jeke ınvestorlardyń qoldaýymen jańa jyly aıaldamalardyń ornatylyp jatqanyna óte qýanyshtymyn. Eski aıaldamalardy ne istemek oılaryńyz bar? Qalanyń basqa jerlerine ornalastyrasyzdar ma? Abylaı han men Qoshqarbaev dańǵyldarynyń boıyndaǵy balalar aýrýhanasynyń janyna jyly aıaldama ornatylsa deımiz. Qalanyń sheti bolǵandyqtan, bul óte mańyzdy. Mega Silk Way aldyna jyly aıaldama ornatylady ma? Eger osy pýnktterde aıaldamalar josparlansa, qaı ýaqytta paıdalanýǵa beriledi? », - dep surady E. Sákenov.
Jeke ınvestorlar aıaldamalardy aýystyrǵan kezde josparǵa sáıkes basqa jerlerge ornatylady. Abylaı han dańǵyly boıyndaǵy № 2 balalar aýrýhanasy mańynda jabyq tıptegi avtobýs aıaldamasy ornatyldy. «Astanadaǵy jabyq tıptegi 55 aıaldama» jobasy boıynsha Turar Rysqulov kóshesindegi № 2 qalalyq aýrýhana mańynda qarasha aıynyń sońyna deıin jyly aıaldama ornatylady. Sondaı-aq, qala ákimi № 1 aýrýhana men «Magným» gıpermarketi tusyndaǵy jol aıyryǵyn paıdalanýǵa berý merzimin de atap ótti. 2018 jyldyń 15 qarashasyna deıin Abylaı han dańǵyly men Q. Qoshqarbaev dańǵylynyń qıylysynda jol kólik aıyryǵyn ashý josparlanǵan. Qazirgi tańda kóshe jaryqtaryn qosý jumystary júrgizilýde.
Eske sala ketsek, buǵan deıin jańa jyly aıaldamalar nelikten jumys istemeı turǵanyn qalalyq ákimdiktiń ókili aıtyp bergen bolatyn. Sondaı-aq qyrkúıek aıynyń sońynda qala ishinde ájethanasy bar jyly aıaldamalar ornatylatyny habarlandy.
