Elordada jyl sońyna deıin taǵy 100 jańa elektr avtobýsy jolǵa shyǵady
NUR-SULTAN. QazAqparat - Oqý jyly bastalyp, demalys maýsymynyń aıaqtalýyna oraı qala joldarynda kólik aǵyny artady. Qozǵalys qaýipsizdigin qamtamasyz etý úshin keıbir kóshelerde jol jumystary júrip jatyr. Astana ákimdigi osynyń bárin eskere otyryp, marshrýtty aldyn ala josparlaýǵa shaqyrady, dep habarlaıdy QazAqparat.
Kólik basqarmasyna jelige barynsha kóbirek qoǵamdyq kólik, suranysqa ıe marshrýttarǵa qosymsha avtobýstar shyǵarý tapsyryldy.
Bıyl jyl sońyna deıin taǵy 100 jańa elektr avtobýsyn iske qosý josparlanyp otyr.
Kóshelerde kólik aǵynyn seıiltý úshin bıyl tamyz aıynda Uly dala kópirinde qozǵalys ashyldy.
Kópir Máńgilik el dańǵylyndaǵy, A.Baıtursynuly, R. Qoshqarbaev, J.Nájimedenov kóshelerindegi, Nova city aýdany men «Myńjyldyq» alleıasyndaǵy kólik aǵynyn ishinara seıiltýge múmkindik beredi, buǵan qosa jańa «Nurly jol» vokzaly, Telman jáne Promyshlennyı eldi mekenderi, METRO gıpermarketi aýdany, Jumabaev dańǵyly, Júrgenov kóshesi jáne basqa joldar arasynda baılanysty arttyrady.
Sol sııaqty A62 kóshesiniń (A91 kóshesinen Nur-Sultan – Qaraǵandy trassasyna deıingi aralyq) qurylysy júrip jatyr.
Jospar boıynsha bul mańaıda qozǵalys bıyl kúzde ashylady.
Bul kóshe Qaraǵandy trassasy men «Nurly jol» temirjol vokzaly, sol sııaqty qalanyń sol jaq bóligi arasynda kólik qatynasyn qamtamasyz etedi.
Kólik qozǵalysyna arnalǵan taǵy bir kópir kelesi jyly ashylady. Ol Esil ózeni arqyly Táýelsizdik dańǵylyn jalǵaıdy.
Foto: Nur-Sultan qalasynyń ákimdigi
