Elordada jyl sońyna deıin 111 úı súriledi
ASTANA. QazAqparat - 2013 jyldan beri elordada apatty úılerdi ysyrýǵa arnalǵan joba júzege asyrylýda. Bıyl jyldyń sońyna deıin 111 úıdiń súrý josparlanyp otyr. Apatty jaǵdaıdaǵy bul úılerde turatyn 1 700 otbasyǵa qalanyń basqa aýdandarynan baspana usynylyp otyr, dep málimdedi elorda ákimdiginiń medıa ortalyǵyna Turǵyn úı basqarmasy basshysynyń orynbasary Ashat Eleýjanov.
Joba boıynsha súrilýge negizinen tozyǵy jetken, ótken ǵasyrdyń 40-70 jyldary salynǵan úıler jiberiledi. Basqarma ókiliniń sózinshe, bul úılerde turý turǵyndardyń ómiri men densaýlyǵyna qaýipti.
Qanatqaqty jobanyń shartyna sáıkes, apatty baspananyń ornyna páter ıesine qalanyń basqa aýmaǵynan dál sol páterdiń aýdanyna sáıkes baspana beriledi.
Turǵyn úı basqarmasynyń ókili bul jaǵdaıda jańa baspana berilgende turǵyn úıdiń bólmesi men otbasy músheleriniń sany esepke alynbaıdy. Tek turǵyn úıdiń jalpy aýdany ǵana eskeriledi.
2013 jyldan beri elordada 117 apatty jaǵdaıdaǵy úı kúrelip, 1 500 otbasy jańa orynǵa qonystandy.
«Búgingi tańda elordanyń keıbir turǵyndarynda tótenshe jaǵdaıda turǵan apatty úılerdi súrý jumysy aldaǵy EKSPO kórmesimen baılanysty degen jańsaq pikir bar. Negizinde ol jobaǵa sáıkes aǵymdaǵy jumys. 2017 jyldyń sońyna deıin Astanada 1 700 otbasy turatyn 111 apatty úıdi súrý kózdelip otyr», - dedi A. Eleýjanov.
