Elordada jyl saıyn mıllıon sharshy metr páter paıdalanýǵa beriledi - I.Tasmaǵambetov
ASTANA. 27 jeltoqsan. QazAqparat - Elordada jyl saıyn mıllıon sharshy metr páter paıdalanýǵa beriledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Astana qalasynyń ákimi Imanǵalı Tasmaǵambetov aıtty.
«Qazirgi ýaqytta biz jyl saıyn 1 mln. sharshy metrden artyq turǵyn úıdi paıdalanýǵa beremiz. 2013 jyldyń qorytyndysy boıynsha elordada 1 mln. 200 myń sharshy metr turǵyn úı berildi», - dedi ol.
Qala basshysynyń atap ótýinshe, Astana elimizdiń elordasy atalǵan ýaqyttan beri 12 mln. sharshy metr turǵyn úı salynyp, paıdalanýǵa berilgen. Memlekettik qoldaý men túrli baǵdarlamalardyń arqasynda 18 myń otbasy nemese 60 myń adam baspanaly boldy.
«Osylaısha, sońǵy 15 jyldyń ishinde Astana halqynyń turǵyn úımen ortasha qamtamasyz etilýi adam basyna 15-ten 25 sharshy metrge deıin ósti», - dedi I.Tasmaǵambetov.
