Elordada jyl saıyn 2 myńǵa jýyq adam obyrǵa shaldyǵady
NUR-SULTAN. QazAqparat – Nur-Sultan qalasynda jyl saıyn 1900 obyr aýrýyna shaldyǵý jaǵdaıy tirkeledi.
Bul týraly Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov málim etti, dep habarlaıdy QazAqparat tilshisi.
«Jyl saıyn 4 aqpanda halyqaralyq obyrǵa qarsy uıymnyń (UICC) bastamasymen Dúnıejúzilik obyrǵa qarsy kúres kúni atalyp ótedi. Onyń maqsaty - onkologııalyq aýrýlardyń aldyn-alý jáne ony erte anyqtaý týraly halyqty aqparattandyrý, adamnyń óz densaýlyǵyna degen jaýapkershiligin qalyptastyrý jáne qoljetimdi skrınıngtik zertteýler týraly aqparat berý», - dedi T. Muratov ataýly kúnge oraı onlaın ótken baspasóz máslıhatynda.
Onyń aıtýynsha, adam boıyndaǵy qaterli isik asqynyp ketpeı turyp anyqtalsa, ony joıýdyń tolyq múmkindigi bar.
«Jyl saıyn Nur-Sultan qalasynda obyrdyń jańa 1900 jaǵdaıy tirkeledi. Búgingi kúni dıspanserlik esepte 11 546 patsıent tur. Obyr derti qurylymyna qaraı ishinara bólinedi. Sonyń ishinde 1 orynda sút beziniń obyry -15,7%, 2 orynda ókpe obyry -9,6%, 3 orynda asqazan obyry 6,6%, 4 orynda ishek obyry -5,0% jáne 5 orynda teri obyry 4,3% quraıdy. Atalǵan aýrýdyń aldyn alý jáne joıý maqsatynda bizdiń basqarma onkologııalyq mekemelermen birlesip qyzmet atqarýda. Obyr saldarynan adam óliminiń azaıýy, ol derttiń asqynýyna jol bermeýmen tikeleı baılanysty. ıAǵnı qaterli isik erte anyqtalsa, ol adamdy emdeýdiń múmkindigi mol degen sóz», - deıdi ol.
Basqarma basshysynyń sózine sensek, elordada ótken jyly qaterli isik saldarynan adam ólimi kórsetkishi aıtarlyqtaı tómendegen.
