Elordada «Jyl muǵalimi - 2016» konkýrsynyń jeńimpazy marapattaldy
ASTANA. QazAqparat - Búgin elordada Muǵalimder kúnine arnalǵan saltanatty shara barysynda «Jyl muǵalimi - 2016» qalalyq konkýrsynyń jeńimpazy marapattaldy. Atalǵan baıqaýda daryndy balalarǵa arnalǵan №9 mekteptiń bıologııa pániniń muǵalimi Lázim Qasymova úzdik atandy, dep habarlaıdy qalalyq ákimdiktiń baspasóz qyzmeti.
Shara barysynda Astana qalasy ákiminiń orynbasary Ermek Amanshaev úzdik pedagogty jáne jınalǵan qaýymdy quttyqtap, sóz sóıledi.
- Muǵalim bolý árkimniń qolynan kele bermeıdi, bul qyzmette qýanysh ta, qıyndyqtar da bolady, siz osy kásipke ómirińizdi arnap, bolashaq urpaqty tárbıelep, oqytyp kelesiz. Jyldan jylǵa túlekterimiz, mektep oqýshylary jaqsy nátıjelerge qol jetkizýde. Osy úshin zor alǵysymdy bildiremin, merekelerińizben, - dedi Ermek Amanshaev.
Elorda basshysynyń orynbasary kóp jyl eńbek etken muǵalimder men jas mamandarǵa óz qolynan qyzmettik páterdiń kiltin tabystady.
- Astana qalasynyń ákimi Áset Isekeshevtiń sheshimimen jyl sońyna deıin ákimdik osy dástúrdi jalǵastyratyn bolady. Menińshe, jyl aıaqtalǵansha Táýelsizdik kúni qarsańynda baspanaly bolatyn muǵalimder men oqytýshylar sany on esege artady, - dedi Ermek Amanshaev.
Saltanatty shara barysynda túrli nomınatsııalar boıynsha jeńimpazdar marapattaldy.
Ústimizdegi jyly №26 «Úmit» balabaqshasy úzdik dep tanyldy. Mektepter arasynda Raıymbek batyr atyndaǵy №50 «Qazǵarysh» mektep-lıtseıi top jardy.
«Qosymsha bilim beretin úzdik uıym» nomınatsııasynda M. Ótemisov atyndaǵy Oqýshylar saraıy kósh bastady. Kólik jáne kommýnıkatsııa kolledji úzdik tehnıkalyq jáne kásiptik bilim beretin uıym atandy.
Mamandandyrylǵan uıymdardyń ishinde №3 Psıhologııalyq-medıtsınalyq- pedagogıkalyq konsýltatsııa úzdik boldy, al №17 mektep-gımnazııa ınnovatsııalyq mektep atandy.
Munymen qosa, №66 mektep-lıtseıdiń bastaýysh synyp oqytýshysy Maııa Jubanyshqalıeva men orys tili jáne ádebıetiniń muǵalimi Qanıpa Sábıtovaǵa «QR bilim berý isiniń qurmetti qyzmetkeri» tósbelgisi tabystaldy.
«12 jyldyq bilim berý júıesin qoldaý jáne aǵylshyn tili ortalyǵy» MKQK dırektory Baqyt Qadyrova, №6 mektep-gımnazııasynyń matematıka muǵalimi Tatıana Anısıfırova, №36 OM geografııa muǵalimi Lılııa Bystrova, №15 mektep-lıtseıdiń frantsýz tiliniń múǵalimi Natalıa Pashkova, Energetıka jáne baılanys kolledjiniń orys tili jáne ádebıeti pániniń muǵalimi Álııa Zakırova QR Bilim jáne ǵylym mınıstrliginiń vedomstvolyq nagradalarymen, «Ybyraı Altynsarın» tósbelgisimen marapattaldy.
