Elordada jyl basynan jol apaty saldarynan 22 adam qaza tapty

Nur-Sultan qalalyq polıtsııa departamentiniń basshysy, polıtsııa general-maıory Erjan Sádenovtiń atap ótýinshe, jańbyrdyń alǵashqy tamshylary júrgizýshiler úshin barynsha qaýipti sanalady. Sebebi jol jabyndysy shań-tozań, onyń ústine ústine kúzgi ýaqytta japyraqtar túsip jatyr. Dál osy jaıt kólik quralynyń toqtaý jolynyń uzarýyna sebep bolady. Sondyqtan kúrt manevr jasap, tejegishti basyp qalýdan saq bolǵan jón. Jańbyr kórinisti te tómendetetindikten kólikti barynsha abaılap júrgizý kerek.

Nur-Sultan qalalyq polıtsııa departamenti baspasóz qyzmetiniń málimetinshe, ótken jyldyń dál osyndaı kezeńimen salystyrǵanda elorda aýmaǵynda jol oqıǵalarynyń sany 67 paıyzǵa tómendedi. Degenmen, kóptegen júrgizýshi jol júrisi erejesin saqtaı bermeıdi.

«Jyl basynan Ákimshilik polıtsııa basqarmasy jol-kólik oqıǵalaryna saraptama júrgizdi. Eger 2019 jyly 421 jol-kólik oqıǵasy tirkelse, 2020 jyldyń basynan beri 285 oqıǵa oryn alǵan. Jyl basynan beri jol apaty saldarynan 22 adam qaza taýyp, 320 adam jaraqattandy. Aıtalyq, 5 qazan kúni saǵat 17-34-te «Mercedes-Benz G55» kóligin basqarǵan júrgizýshi 69-shy kóshe boıymen Alash tasy joly jaqtan Pýshkın kóshesine qaraı kele jatyp jyldamdyq rejımin jáne qashyqtyqty saqtamaı «Mercedes-benz E 300» kóligin soqqan. Soqqy saldarynan «Mercedes-benz E 300» kóligi ushyp ketip, qarsy baǵytta kele jatqan «Hyundai Accent» kóligimen qaqtyǵysqan. Jol-kólik oqıǵasy saldarynan kólikterdiń biriniń jolaýshysy jaraqat alyp, qalalyq aýrýhanaǵa jetkizildi. Dárigerler qaraǵannan keıin ol úıine jiberildi. Qazirgi ýaqytta osy fakti boıynsha tergeý júrgizilip jatyr», - dedi vedomstvodan.

Osyǵan oraı Nur-Sultan qalalyq polıtsııa departamenti júrgizýshilerdi kólikpen jolda júrgende barynsha saq ári uqypty bolýǵa, jyldamdy rejımin múltiksiz saqtaýǵa, qaýipsiz araqashyqtyq ustanyp, manevr jasaý erejesin saqtaýǵa shaqyrady.