Elordada jyl basynan beri týý kórsetkishi artyp, ólim kórsetkishi tómendedi
ASTANA. 20 qarasha. QazAqparat - Astana qalasy halqynyń sany 2013 jylǵy 1 qazan jaǵdaıynda 804 474 adamdy, sonyń ishinde Almaty aýdany boıynsha 366 775 (45,6%), Esil aýdanynda 111 055 (13,8%), Saryarqa aýdany boıynsha 326 644 (40,6%) adamdy qurady. Bul týraly astana.kz saıtyna elordalyq Statıstıka departamentinen habarlady.
«Jyl basymen salystyrǵanda, Astana qalasyndaǵy halyqtyń jalpy sany 26 276 adamǵa, sonyń ishinde Almaty aýdany boıynsha - 3 093 adamǵa, Esil aýdany boıynsha - 8 318 adamǵa, Saryarqa aýdany boıynsha 14 865 adamǵa kóbeıdi», - delingen vedomstvo aqparatynda. Ústimizdegi jyldyń 9 aıynda jalpy Astana qalasy boıynsha 16 315 sábı dúnıege kelgen, bul ótken jyldyń sáıkes kezeńimen salystyrǵanda 12,5% artyq. Sonymen qatar, halyqtyń tabıǵı ósimi ótken jylǵy qańtar-qyrkúıekpen salystyrǵanda 15,8% kóterildi jáne 13 724 adamǵa jetti. Osy aralyqta qalada 2 591 adam qaıtys boldy, bul 2012 jylǵy qańtar-qyrkúıektegi kórsetkishten 2,3% az. Qańtar-qyrkúıekte 1 jasqa deıingi balalar óliminiń 139 jaǵdaıy tirkeldi, bul 2012 jyldyń sáıkes kezeńine qaraǵanda 29 jaǵdaıǵa tómen. Sábıler ólim-jitiminiń koeffıtsıenti 8,52-ni (2012 jylǵy qańtar-qyrkúıekte - 11,59) qurady. Halyq óliminiń negizgi sebepteriniń ishinde eń úlken úles salmaqty, qan aınalymy júıesi aýrýlary - 36,3%, óskinder - 17,3%, jazataıym oqıǵalar, ýlaný jáne jaraqattaný 15,6% alady. 2013 jylǵy qańtar-qyrkúıekte AHAT organdarynda tirkelgen nekelesýler sany ótken jyldyń sáıkes kezeńimen salystyrǵanda 7,2%, ajyrasýlar sany 16,9% artqan.
