Elordada jyl basynan beri sybaılas jemqorlyqqa qatysty 82 qylmys tirkeldi
Bul týraly Sybaılas jemqorlyqqa qarsy is-qımyl agenttiginiń Nur-Sultan qalasy boıynsha departamenti basshysy Nurlan Qydyrbaev «Antikor.Live» jobasy aıasyndaǵy onlaın brıfıngte aıtty, dep habarlaıdy QazAqparat tilshisi.
«Elordada jyl basynan beri 82 qylmys tirkeldi. Onyń 62-si - jergilikti sybaılas jemqorlyqpen baılanysty aýyr qylmys. Olarǵa qatysty tergeý jumystary júrgizilip jatyr. Prezıdenttiń bizge bergen tapsyrmasy boıynsha jumystar atqarylyp jatyr. Qazirgi ýaqytta áýejaı boıynsha, Almaty aýdany ákimniń orynbasary jáne biraz laýazymdy qyzmetkerlerdiń qylmysy boıynsha tergeý jumysy júrip jatyr», - deıdi Sybaılas jemqorlyqqa qarsy is-qımyl agenttiginiń Nur-Sultan qalasy boıynsha departamentiniń basshysy Nurlan Qydyrbaev.
Onyń aıtýynsha, byltyr atalǵan agenttikte memlekettik qyzmet boıynsha jeke bólim ashylǵan.
«Jeke bólingennen keıin bizdiń agenttikte parasattylyq, aldyn alý jáne seriktestik degen úsh departament paıda boldy. Bul - óte durys sheshim. Osy baǵyttar boıynsha jumys istep jatyrmyz. Aldyn alý departamenti kóp qylmysty boldyrmaý úshin jumys isteıdi. Bul baǵytta densaýlyq saqtaý, dene shynyqtyrý jáne basqa da departamentter boıynsha 8 syrtqy taldaý júrgizdik. Qazirgi kezde qaladaǵy mekeme basshylary men ákimdiktiń basqarmalarymen memorandýmǵa qol qoıyp, birge jumys istep jatyrmyz», - deıdi ol.