Elordada jyl basynan beri múmkindigi shekteýli 383 adam jumysqa ornalasty
NUR-SULTAN. QazAqparat - Jyl basynan beri elordanyń Jumyspen qamtý ortalyǵyna múmkindigi shekteýli 425 adam júgingen, onyń 383-i jumysqa ornalasty, dep habarlaıdy QazAqparat elorda ákimdiginiń resmı saıtyna silteme jasap.
Nur-Sultanda 150-ge jýyq uıym múmkindigi shekteýli jandardy jumysqa qabyldaıdy. Azamattardyń bul sanaty úshin Jumyspen qamtý ortalyǵynda jeke sektor bar, onda azamattar kezeksiz qabyldanady.
Munda eńbek ınspektorynyń qatysýymen jumys berýshilermen júıeli túrde kezdesýler ótkiziledi. Ortalyq mamandary múmkindigi shekteýli jandar úshin arnaıy jumys oryndaryn qurý qajettiligi týraly jıi aıtyp otyrady. Bul úshin memleket arnaıy sýbsıdııa bóledi. Atap aıtqanda, jumys berýshilerdiń jumys oryndaryn jabdyqtaýǵa ketken shyǵyndary óteledi.
Áleýmettik jumys oryndaryn jumys berýshi Jumyspen qamtý ortalyǵymen kelisimshartqa otyrǵannan keıin ashady. Osylaısha, 12 aı boıy memleket jumysqa ornalasýshylardyń jalaqysyn sýbsıdııalaıdy. Onyń mólsheri – jalaqynyń 35%-y. Bul tusta múmkindigi shekteýli jandarǵa artyqshylyqtar beriledi.
Óz kezeginde elorda turǵyndarynyń Jumyspen qamtý ortalyǵy qyzmetkerlerine jumys tabýda kórsetken qoldaýy men kómegi úshin alǵysy sheksiz.
«Múgedek jandarǵa jumys tabý ońaı emes, biraq Altaı Kólginov basqaryp otyrǵan ákimdik jumysynyń arqasynda Jumyspen qamtý ortalyǵy arqyly men jáne qasymdaǵy áriptesterim múgedektigimizge qaramastan, kafege jumysqa turdyq. Rahmet. Qalamyzda «Bazylov» JShS («Emodjı» kafe-bary) sııaqty jumys berýshiler men áleýmettik jobalar kóbeıse eken»,- deıdi astanalyq Aıgúl Temirǵalıeva.
