Elordada jyl basynan beri qoǵamdyq tártipti buzǵandarǵa 10 mln. 672 myń 963 teńge aıyppul salyndy
ASTANA. 16 sáýir. QazAqparat - Astanada jyl basynan beri ákimshilik quqyqbuzýshylyq týraly 3 myń 955 hattama toltyrylyp, quny 10 mıllıon 672 myń 963 teńgege aıyppul salyndy.
Bul týraly búgin jýrnalıstermen bolǵan baspasóz máslıhatynda Astana qalalyq Іshki ister departamentiniń Qoǵamdyq qaýipsizdik basqarmasynyń bastyǵy Batyrlan Esenbaı málim etti.
Onyń derekterine qaraǵanda, Astana qalalyq Іshki ister departamentiniń qyzmetkerleri turaqty túrde qoǵamdyq oryndar men qala kóshelerinde qoǵamdyq tártipti qamtamasyz etýge baǵyttalǵan sharalardy júzege asyryp keledi. Sońǵy ýaqytta bul baǵyttaǵy jumystar kúsheıtilgen rejimde júrgizilýde.
«Osy aptanyń demalys kúnderinde, ıaǵnı 12-15 sáýir aralyǵynda elordalyq tártip saqshylary arnaıy reıd júrgizip, 2 myńnan astam quqyqbuzýshylyqtardy anyqtady»,-deıdi basqarma bastyǵy.
Onyń derekterinshe, 12 sáýir kúni ýchaskelik polıtsııa qyzmetkerleri qoǵamdyq orynda qoqsyq laqtyrǵan 3 azamatty ustaǵan. Atalǵan azamattar polıtsııa qyzmetkerleriniń eskertýine qaramastan, zańsyz áreketterin jalǵastyra bergen. Nátıjesinde olarǵa qatysty tıisti qujattar toltyrylyp, mamandandyrylǵan aýdanaralyq sottyń sheshimimen tártip buzýshylar 1 táýlikke qamaýǵa alyndy.
«Sonymen qatar astanadaǵy dámhanalardyń biriniń qyzmeti tártip saqshylarynyń yqpalymen toqtatyldy. Dámhana ıesi tártip saqshylarynyń ǵımarat ishinde temeki shekpeý jónindegi eskertýlerine qaramastan, dámhanada otyrǵandarǵa temeki shegýge ruqsat bergen»,-dedi B.Esenbaı.
Sondaı-aq, elordalyq polıtseıler qalany abattandyrý men ınfraqurylymdyq nysandardy jáne jasyl jelekterdi buzý jaǵdaılary boıynsha da tekserý sharalaryn júrgizip otyrady. Ótken 2011 jyly bul baǵytta 10 myń ákimshilik quyqbuzýshylyq anyqtalyp, 11 mıllıon teńgege aıyppul salyndy.
