Elordada jyl basynan beri 72 adam tamaqtan ýlandy

NUR-SULTAN. QazAqparat – Nur-Sultan qalasy sanıtarlyq-epıdemıologııalyq baqylaý departamentiniń bólim basshysy Elena Gartmannyń aıtýynsha, jyl basynan beri elordada 72 adam tamaqtan ýlanǵan, dep habarlaıdy QazAqparat tilshisi.

«Jyl basynan beri elordada qoǵamdyq tamaqtaný obektilerinde tamaqtan ýlaný jaǵdaılary tirkeldi. Saldarynan 72 adam zardap shekti. Onyń ishinde jasy 14-ke tolmaǵan 3 bala bar. Kún raıynyń jylynýyna baılanysty taǵamdy durys saqtamaýdyń saldarynan ýlaný jaıttary jıilep barady. Tamaqtan ýlaný belgileriniń ınkýbatsııalyq kezeńi 30 mınýttan 24 saǵat aralyǵynda baıqalýy múmkin. Degenmen, kóp jaǵdaılarda ýlaný belgileri 2-6 saǵat aralyǵynda aıqyn kórinedi. Naýqastyń boıynda júrek aıný, qusý, dıareıa (ish ótý), álsizdik, uıqy qashý, asqazan nemese ishek aýrýy, bas aýrýy, dene qyzýynyń kóterilýi sııakty belgiler paıda bolady. Jalpy syrqattanýdyń kezeńi adam aǵzasynyń jasyna jáne jalpy jaǵdaıyna, bakterııalardyń nemese toksınderdiń alýan túrine, qabyldanǵan tamaq mólsherine baılanysty. Eresekterge qaraǵanda kishkentaı balalarda aýrý aǵymy áldeqaıda aýyr túrde ótetinin atap ótý qajet», - deıdi maman.

Sondaı-aq ol tamaqtan ýalanǵan jaǵdaıda ózdiginen em jasaý qaýipti ekenin eskertedi.

«Osyǵan baılanysty, elordanyń sanıtarlyq-epıdemıologııalyq baqylaý departamenti turǵyndardy ózin-ózi emdeýmen aınalyspaýǵa, emdeý kýrsyn taǵaıyndaý jáne yqtımal asqynýlardy boldyrmaý úshin dárigerge ýaqtyly júginýge shaqyrady», - deıdi Elena Gartman.

Ótken aıda Qostanaı oblysynyń Rýdnyı qalasynda kolledj stýdentteriniń ashanada jappaı ýlanýyna qatysty tekserý bastalǵanyn jazǵan edik.