Elordada jyl basynan beri 20-dan astam balany hımııalyq kúıik shalǵan
NUR-SULTAN. QazAqparat - Qalalyq balalar aýrýhanasynda balalardy turmystyq hımııalyq zattardan ýlaný jáne kúıýden qorǵaý máselesi qaraldy, dep habarlaıdy QazAqparat tilshisi.
«Kún ótken saıyn bul másele kúrdelenip otyr. Balalar arasynda óńesh aýrýlary ishinde hımııalyq kúıik pen ýlaný alǵashqy orynda tur. Ásirese bul 1-5 jas aralyǵyndaǵy balalar arasynda jıi kezdesedi. Hımııalyq zattardan kúıý oqıǵasynyń kóbeıýine birinshi sebep - hımııalyq zattardyń balalarǵa qoljetimdi jerde bolýy. Ekinshi sebep - onyń ydystarynyń kóztartarlyq bolýy, ıaǵnı syrtqy bezendirilýi balalar úshin tartymdy.Úshinshiden, onyń qaqpaǵynyń ońaı ashylýy. Ókinishke qaraı, jyl basynan beri 22 bala turmystyq hımııalyq zattardan ýlanyp, kúıik shaldy. Taǵy bir ókinishtisi - balalar úlkenderdiń salǵyrttyǵynan jáne jete kóńil bólmeýinen osyndaı jaǵdaıǵa dýshar bolyp otyr. ıAǵnı kúıik shalý men ýlanýdyń 80% balalardyń hımııalyq zattardy abaısyzda iship, jutyp qoıýynan bolǵan», - dedi qalalyq №2 balalar aýrýhanasynyń hırýrg dárigeri Serikjan Nurjanov.
Onyń aıtýynsha, turmystyq hımııalyq zattardyń bir jutymy balalardyń ýlanýyna nemese óńeshiniń kúıýine jetkilikti. Balalar jıi zardap shegetin turmystyq zattar qataryna Comet, Domestos, Mr Muscle, Ýtenok jáne taǵy basqa saýda markalary jatady.
«Odan bólek, taǵam ázirleý kezinde qosatyn qospalar jáne kosmetıkalyq boıaýlar bar. Jalpy, hımııalyq zattardan kúıý dárejesi úshke bólinedi. Birinshisi - kúıip qyzaryp qalý, kúıik ornynyń terisi qaıta túlep shamamen 2 aptanyń ishinde jazylady. Ekinshi dáreje - teriniń nemese asqazan, jutqynshaqtyń shyryshty qabattary men bulshyqetteriniń kúıýi. Bul tyrtyqqa alyp kelmeıdi, biraq onyń jazylý ýaqyty uzaǵyraq. Al eń aýyr dárejesi úshinshisi - odan búkil tynys joldary zardap shegedi. Sondaı-aq, tyrtyq paıda bolýymen qatar, balanyń ishki qurylystary zaqymdanady»,- deıdi ol.
Dáriger mamannyń sózinshe, eń qıyny - hımııalyq zattyń qanǵa ótip ketýi. Sebebi, olaı bolǵan jaǵdaıda tikeleı búırek pen baýyrdyń qyzmetine zaqym keledi.
«Bala hımııalyq zattardy iship qoıǵan jaǵdaıda jedel járdem kelem degenshe onyń aýyz qýysyn shaıý kerek, sondaı-aq, kóp suıyqtyq berip, qustyrý qajet. Alǵashqy kómektiń bul túrin balabaqsha, mektep, JOO qabyrǵasynda arnaıy lektsııa oqyp túsindirgen abzal. Sonymen qatar, ata-analar arasynda da túsindirý jumystaryn jıi uıymdastyrǵan jón», - dedi hırýrg dáriger.
Qalalyq №2 balalar aýrýhanasynyń málimetine súıensek, sońǵy eki jylda aýrýhanaǵa turmystyq hımııalyq zattardan zardap shekken 200-ge jýyq bala jatqyzylǵan.
