Elordada jyl basynan 60 qurylys nysany jumystaryn ruqsat qujattarynsyz júrgizgen
ASTANA. QazAqparat - Elordada jyl basynan beri qurylys nysandarynda 9315 tekserý júrgizildi. Bul týraly Sáýlet jáne qala qurylysy basqarmasynyń basshysy Vıtalıı Sıletskıı qalalyq máslıhatta ótken kópshilik tyńdaý barysynda málim etti, dep habarlady astana.kz.
«Sáýlet jáne qala qurylysy basqarmasynyń qala aýmaǵynda qala qurylysy jáne arhıtektýralyq qyzmet salasyndaǵy normatıvtik quqyqtyq aktilerdi saqtaýdy baqylaý jónindegi jumysy týraly» taqyrybynda ótken jıynda onyń aıtýynsha, 2015 jylǵy 1 maýsym jaǵdaıy boıynsha, qoldanystaǵy zańnamany buzýdyń 93 faktisi anyqtalǵan, sonyń ishinde 60-y ruqsat qujattarynsyz qurylys jumystaryn júrgizý jáne 33-i nysandardyń bekitilgen jobalyq qujattamaǵa sáıkes bolmaýy. Sonymen qatar basqarma basshysy máslıhat depýtattaryn qaladaǵy jáne qala syrtyndaǵy aýmaqtarda sáýlet jáne qala qurylys salasyndaǵy memlekettik saıasatty iske asyrý boıynsha júrgizilip jatqan jumystarmen, Astana aýmaǵyn damytý úshin qala qurylysy qujattamasynyń jobalarymen tanystyrdy. - 2007 jyldan beri basqarma 111 tolyq josparlaý jobasyn ázirleý men túzetýge tapsyrys bergen. Sońǵy alty jylda basqarma 21 halyqaralyq jáne respýblıkalyq úzdik eskız ıdeıa jáne nysandar tujyrymdamasy konkýrsyn ótkizdi, olardyń ishinde 12-si sáýlettik, beseýi qala qurylysyna arnalǵan jáne tórteýi músindik, - dedi V.Sıletskıı. V.Sıletskııdiń aıtýynsha, Astanada júrgizilgen monıtorıng nátıjelerine sáıkes, qala boıynsha turǵyn alaptaryndaǵy jalpy sanyy 4458 kólikke arnalǵan 25 kólik turaǵy tıisti maqsatta paıdalanylmaǵany, sonyń ishinde 170 kólik orny basqa maqsatta qoldanylyp jatqany anyqtaldy. Sharaǵa qalalyq máslıhat hatshysy Sansyzbaı Esilov, qalalyq máslıhat depýtattary, múddeli qurylymdar men vedomstvo ókilderi jáne Astana qalasynyń turǵyndary qatysty.
