Elordada jyl basynan 3 myńnan astam jaıaý júrginshi ákimshilik jazaǵa tartyldy

Bul týraly Astana qalalyq ІІD Jol polıtsııasy basqarmasynan málim etti.

Statıstıkalyq málimetter boıynsha, jaıaý júrginshilerdiń qatysýymen bolatyn jol-kólik oqıǵalarynyń sany joǵary deńgeıde saqtalýda jáne kóbine atalǵan apattardy jaıaý júrginshilerdiń ózderi týdyratyn kórinedi.

Máselen, 2013 jyldyń 2 aıynda jaıaý júrginshilerdiń qatysýymen bolǵan apattardyń jalpy sanynyń 50 paıyzy jaıaý júrginshiler kesirinen bolǵan. Búginde Astanada jol qozǵalysy erejesin buzǵany úshin ákimshilik jaýapqa 3 myńnan astam jaıaý júrginshi tartyldy.

Erejeni buzý boıynsha negizinen joldy ruqsat etilmegen jerden qıyp ótý, jolǵa kútpegen jerden oqys shyǵý sekildi derekter kezdesedi.

Barlyq ereje buzýshylarǵa ákimshilik hattama toltyrylady. Osy oraıda 5 AEK (8 655 teńge) kóleminde aıyppul qarastyrylǵan. Júıeli túrde ereje buzǵandarǵa qatysty aıyppul 15 AEK deńgeıinde salynady nemese 3 táýlikke ákimshilik qamaýǵa alý eskerilgen.