Elordada jýrnalısti óltirgen adam 11 jylǵa sottaldy
NUR-SULTAN. QazAqparat - Nur-Sultan qalasynyń soty jýrnalıst Irına Beketovany óltirgen qylmyskerdi 11 jylǵa bas bostandyǵynan aıyrýǵa úkim shyǵardy, dep habarlaıdy QazAqparat.
«2019 jyldyń 23 sáýirindegi sot úkimimen A.M. Gýseınov QR QK 106-baby, 3-bóligi boıynsha ortasha qaýipsiz QAJ mekemesinde 11 jyl jazasyn óteıdi. Jaza qylmys aıybyn aýyrlatatyn mán-jaılardy eskere otyryp uıǵaryldy. Oqıǵa bolǵan kúni qylmysker alkogoldi ishimdikke mas bolǵan», - dep habarlady qalalyq sottyń baspasóz qyzmeti.
Sot sheshimimen aıyptalýshydan zardap shekken tarapqa 6 mıllıon teńge moraldyq ótemaqy óndiriledi. Onyń 4 mıllıon teńgesi I. D. Beketovanyń kámelettik jasqa tolmaǵan balalaryna beriledi.
Eske salaıyq, 37 jastaǵy tilshi Irına Beketova qyrkúıek aıynda mert boldy. Quqyq qorǵaýshylar onyń azamattyq nekedegi kúıeýi 34 jastaǵy Anatolıı Gýseınov kúdikti retinde tanydy. Olardyń nekesinen eki bala dúnıege kelgen.
ІІM-niń málimetinshe, A.Gýseınov jýrnalıst kelinshekti úıdiń kireberisinde ózge er adammen turǵanyn kórgen. Beketova men Gýseınov arasynda urys-keris bastalǵan. Kelinshektiń tanysy ol jerden ketip bara jatyp, áıel soqqyǵa jyǵylyp jatqanyn estigen. «Qaıta aınalyp, joǵary kóterilgende es-tússiz jatqan áıeldi kórip, jedel járdem shaqyrǵan. Bul ýaqytta Gýseınov qashyp ketken», - dedi ІІM resmı ókili.
Kóz jumǵan Irına Beketovanyń sońynda úsh uly men bir qyzy qaldy.
