Elordada júrgizýshi men kondýktor boıjetkendi ajaldan aman alyp qaldy
ASTANA. QazAqparat - Astana qalalyq №71 baǵdar avtobýsynyń júrgizýshisi men kondýktory 18 jastaǵy boıjetkendi ajaldan aman alyp qaldy, dep habarlaıdy QazAqparat tilshisi.
«№71 avtobýstyń júrgizýshisi men kondýktoryna zor alǵysymdy bildiremin. Olar qazir ǵana kóz aldymda 18 jastaǵy qyzdyń ómirin aman saqtap qaldy. S.Asanbaev pen onyń kómekshisi N.Tólegenovke kóp rahmet, endi N-nyń ómirine qaýip joq», - dep jazdy Lázzat Ádilhan Feısbýk áleýmettik jelisindegi «Ne? Qaıda? Qashan?» dep atalatyn topta.
Onyń sózine qaraǵanda, boıjetken avtobýsta ózin nashar sezinip, esten tanyp qulaǵan.
«Eýrazııa» aıaldamasynea jete bergenimizde onyń kózderi aqshıyp ketti. Boıjetkendi avtobýstan kóterip shyǵyp, alǵashqy medıtsınalyq kómek kórsete bastady. Birden jedel járdem shaqyryldy. Ol da jyldam kele qaldy. Avtopark qyzmetkerleri men ózge de jolaýshylardyń arqasynda boıjetken birshama esin jınady. Qyzdy dárigerlerge tapsyryp, biz ári qaraı óz jolymyzben kettik», - deıdi Lázzat Ádilhan.
