Elordada júrgizýshi kýáligin 80-120 myń teńge aralyǵynda satqandar ustaldy
NUR-SULTAN. QazAqparat – Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bekaıdarovtyń aıtýynsha, ustalǵan toptyń basty fıgýranty qamaýǵa alynǵan, dep habarlaıdy QazAqparat tilshisi.
«Nur-Sultan qalasynyń mamandandyrylǵan HQKO-y arqyly jalǵan medıtsınalyq anyqtamalar men avtomektepter bitirý týraly kýálikterdi qoldana otyryp qylmys jasaǵan topty ustady. Olar azamattardy is júzinde oqytpaı, teorııalyq jáne praktıkalyq emtıhandar tapsyrtpastan júrgizýshi kýálikterin 80 myńnan bastap 120 myń teńgege deıingi syıaqyǵa zańsyz berýdi uıymdastyrǵan», - dedi Danııar Bekaıdarov onlaın baspasóz máslıhatynda.
Az ýaqyt aralyǵynda olar 2 myńnan astam júrgizýshi kýáligin satqany anyqtalyp otyr.
«Tintý kezinde 7 mektep móri, 479 bitirý týraly kýálik blankisi men adamdardyń saýalnamalyq derekteri toltyrylmaǵan, dárigerlerdiń qoldary men mórleri qoıylǵan №086 úlgisindegi jalǵan medıtsınalyq anyqtamalar tabyldy. Mundaı kýálikterdiń ıeleri jol qozǵalysy erejelerin buzady. Al olardyń áreketteri jol qozǵalysynyń qatysýshylaryn aýyr zardapqa soqtyrýy múmkin. Іstiń bas fıgýranty 2 aıǵa qamaldy», - deıdi ol.
