Elordada júrgizýshi «Dýblın» turǵyn úı keshenin súrýge kedergi jasady

ASTANA. QazAqparat – Búgin jelide elordada zańsyz salynǵan «Dýblın» turǵyn úı keshenin súrýge barǵan mamandarǵa qurylys kompanııasynyń qyzmetkeri kedergi keltirgeni jaıly vıdeo tarady. Osyǵan baılanysty Astana qalalyq ádilet departamenti basshysynyń orynbasary Azamat Berdibekov túsinik berdi, dep habarlaıdy QazAqparat tilshisi.

«Astana qalasynyń mamandandyrylǵan aýdanaralyq ekonomıkalyq soty 4 sáýirde «Stroy Group-2021» JSSh-ge qatysty sheshim shyǵardy. Oǵan sáıkes, seriktestik óz qarajaty esebinen Astana qalasyndaǵy Sh.Aıtmatov jáne J.Moldaǵalıev kósheleri qıylysynda zańsyz salynǵan úıdi súrýge mindetteldi. Sot oryndaýshylar bul isti baqylaýǵa aldy jáne «Stroy Group-2021» JSSh-ge úıdi súrý qajet ekenin eskertip, habarlama joldady. Degenmen oǵan jaýap ala almady. Seriktestik eshqandaı shara qabyldamaǵan soń, úıdi súrý jumystary ákimdikke júkteldi. Joǵaryda atalǵan sot úkimin oryndaý aıasynda búgin mamandar «Dýblın» turǵyn úı keshenin súrýge keldi», - dep túsindirdi Azamat Berdibekov.

Onyń aıtýynsha, súrý jumystaryna jumyldyrylǵan adamdar men tehnıkaǵa kedergi jasaǵan kompanııa qyzmetkerine quqyq qorǵaý organdary shara qabyldaǵan.

«Áleýmettik jelilerden kórgenińizdeı, qurylys alańynda aýyr júk tehnıkasynyń júrgizýshisi sot úkimin oryndaýǵa kedergi jasady. Bul áreketke qatysty quqyq qorǵaý organdary tıisti ákimshilik shara qabyldady. Ol adam polıtsııa basqarmasyna jetkizildi», - dep málim etti ol.

Azamat Berdibekov qandaı jaǵdaı bolsa da, sot úkimi mindetti túrde oryndalýy tıis ekenin atap ótti.

ıAǵnı, tek «Dýblın» TK ǵana emes, sonymen birge atalǵan kompanııaǵa tıesili zańsyz salynǵan «Vashıngton» turǵyn úı kesheni de súriledi.

«Sot úkimi mindetti túrde oryndalýy kerek. Ony talqylaýǵa haqymyz joq. Sondyqtan úı mindetti túrde súriledi», - dep túıindedi departament basshysynyń orynbasary.