Elordada júnnen jasalǵan erekshe kartınalar kórmesi ashyldy
NUR-SULTAN. QazAqparat – Elordadaǵy Ulttyq mýzeıde «Geografııa – mádenı damý baǵyty» atty kórme óz jumysyn bastady, dep habarlaıdy QazAqparat tilshisi.
«Búgin ulttyq mýzeı zaly erekshe kórmemen tolyǵyp jatyr. Qazir, ózderińiz bilesizder, elimiz sán-saltanaty asyp turǵan ýaqytta óńirlerdegi jas talanttarǵa óz múmkindikterin júzege asyrýǵa jaǵdaı jasaýda. Elbasynyń «Rýhanı jańǵyrý» baǵdarlamasy aıasynda ulttyq qundylyqtarymyz qaıta jańǵyryp, dáriptelýde. Búgingi kórme - sonyń kórinisi», - dedi QR Ulttyq mýzeıiniń dırektory Arystanbek Muhamedıuly.
Atalǵan kórmeniń avtory - aǵaıyndy Ańqaýovtar. Qostanaı oblysynyń týmalary kıizden sýret salý ónerin osydan 8 jyl buryn bastaǵan. Olar óz shyǵarmalarynda qoı júniniń erekshe tehnıkamen óńdelgen túrin keńinen qoldanady. Olar qoldanǵan jańa tehnologııalyq baǵyt – kıizdi keskindeme jaǵynan kórsetý.
Sonymen qatar, atalǵan kórmege elimizdiń túrli aımaqtaryndaǵy sheberlerdiń kıiz ben gobelennen jasaǵan eńbekteri, «Arlan Design» sýret galereıasynyń týyndylary, Qazaq Ulttyq óner ýnıversıtetiniń pedagogtary men stýdentteriniń shyǵarmalary usynylyp otyr.
Kórme 30 qyrkúıekke deıin jalǵasady.
