Elordada jumysshy mamandyqtarynyń festıvali bastaldy
ASTANA. KAZINFORM – Búgin bastalǵan jumysshy mamandyqtar qalasy festıvali bes kún (11-15 aqpan) boıy ótedi. Іs-sharany uıymdastyrýshy Oqý-aǵartý mınıstrligi.
Uıymdastyrýshylardyń aıtýynsha, birneshe kún boıy semınarlar, munaı jáne energetıka ónerkásibi taqyryptary boıynsha hakaton, mamandyqtar sherýi, bos jumys oryndary jármeńkesi, startaptardyń tusaýkeseri, mashına jasaý boıynsha sheberlik sabaqtary, kontser pen halyqaralyq akkredıttelgen kolledjderdiń trenıngi sekildi is-sharalar ótedi.
- Jumysshy mamandyqtar jylynda iske asyrylatyn negizgi is-sharalardyń biri elimizdiń 10 kolledjin ınternatsıonaldandyrý. Maqsat — bilim oshaqtaryn jahandyq deńgeıde básekege qabilettiligin arttyrý jáne bilim berý baǵdarlamalaryn halyqaralyq standarttarǵa sáıkestendirý. Atom energetıkasy boıynsha mamandardy daıarlaýda Vengrııanyń tájirıbesin engizý, sondaı-aq Qytaıdyń IT, dron qurastyrý jáne mashına jasaý salasyndaǵy tájirıbesin qoldaný josparlanyp otyr, — dedi festıvaldiń ashylý saltanatynda Oqý-aǵartý mınıstri Ǵanı Beısembaev.
Mınıstrdiń aıtýynsha, 1 qyrkúıekten bastap kolledjderdi jan basyna shaqqandaǵy qarjylandyrý kólemi eki ese ulǵaıady. Qazir 518 kásiporyn kolledjderdi qamqorlyǵyna alǵan, bolashaqta olardyń sanyn 4 myńǵa deıin arttyrý josparlanǵan.
Festıvalge bolashaq jumysshy mamandary, jumys berýshiler men tehnıkalyq jáne kásiptik bilim berý uıymdarynyń basshylary men ókilderi qatysyp jatyr.
Aıta keteıik, «Jumysshy mamandyqtar qalasy» festıvali kún saıyn saǵat 10:00-den 18:30-ǵa deıin Astana qalasy Máńgilik el dańǵyly, 53/1 mekenjaıy «EXPO» halyqaralyq kórme ortalyǵynda ótedi.
Eske sala keteıik, ótken jyly qyrkúıekte Memleket basshysy Qazaqstan halqyna dástúrli Joldaýynda 2025 jyldy jumysshy mamandyqtary jyly dep jarııalanatyny týraly habarlaǵan edi.
Byltyr jeltoqsanda Prezıdent 2025 jyl — Jumysshy mamandyqtarynyń jyly týraly Jarlyqqa qol qoıdy.
Jyl basynda Úkimette jumysshy mamandyqtary jylyn ótkizý jónindegi respýblıkalyq komıssııanyń otyrysy ótti.