Elordada jumysshy mamandyqtar baıqaýynda «Astana Tazalyq» kósh bastady
ASTANA. KAZINFORM — «Astana Tazalyq» qyzmetkerleri qalalyq jumysshy mamandyqtar baıqaýynda top jardy.
Astanada ótken kásibı sheberlik konkýrsynyń jeńimpazdary anyqtaldy. Jarys «Jumysshy mamandyqtar jyly» men «Úzdik» jobasy aıasynda uıymdastyrylyp, qala ákimdigi men «Astana jastary» ortalyǵynyń qoldaýymen kommýnaldyq jáne tehnıkalyq salada eńbek etip júrgen mamandardyń basyn qosty.
Bıylǵy baıqaýdyń aıryqsha tusy — «Astana Tazalyq» JShS mamandarynyń joǵary kórsetkishi boldy. Eki negizgi nomınatsııa boıynsha jeńis dál osy qalalyq kommýnaldyq kásiporyn ókilderine buıyrdy. Nurdáýlet Ábish «Úzdik mehanızator — 2025», al Súndet Qoıbaǵarov «Úzdik júk kóligi júrgizýshisi — 2025» ataǵyn jeńip aldy.
Uıymdastyrýshylardyń aıtýynsha, baıqaýǵa 35 jasqa deıingi, arnaıy tehnıkada jumys isteýge tolyq ruqsaty bar, tájirıbesi men kásibı daıarlyǵy dáleldengen 20 jas maman qatysqan. Synaq kezeńderi múmkindiginshe óndiristegi shynaıy jaǵdaılarǵa beıimdelip ázirlendi. Aldymen qatysýshylar mindetti dárigerlik jáne tehnıkalyq tekseristen ótip, keıin tar alańda manevr jasaý, artqa júrip dál toqtaý, shuǵyl tejelý, estakadaǵa kóterilý, júkti teń ustap júrgizý jáne qoıylǵan kedergilerdi aınalyp ótý sııaqty praktıkalyq tapsyrmalardy oryndady. Aqtyq kezeńde qatysýshylar jol júrý erejelerin bilý deńgeıin teorııalyq test arqyly dáleldedi.
«Úzdik mehanızator — 2025» nomınatsııasynda qatysýshylardyń zamanaýı tehnıkany meńgerý deńgeıi — ony baptaý, qyzmet kórsetý jáne dál basqarý daǵdylary baǵalandy. Al «Úzdik júk kóligi júrgizýshisi — 2025» baıqaýynda aýyr tehnıkamen jumys isteýdegi kásibı sheberlik synaldy. Munda júrgizýshiniń uqyptylyǵy, qaýipsizdik talaptaryn saqtaýy jáne ár manevrdiń naqtylyǵy sheshýshi ról atqardy.
«Astana Tazalyq» qyzmetkerleriniń jeńisi — kommýnaldyq saladaǵy mamandardyń kásibı deńgeıiniń joǵary ekenin taǵy bir márte dáleldedi. Qala tazalyǵy men tártibi úshin kún saıyn jolǵa shyǵatyn «tazalyq saqshylarynyń» kúrdeli tehnıkany meńgerip, óz jumysyna jaýapkershilikpen qaraıdy.
Budan buryn Astanada jol jumysshylaryna arnalǵan jańa demalys bólmeleri ashylǵanyn jazǵan edik.