Elordada jumys kestesiniń ózgerýi kólik keptelisin azaıtty ma – Jeńis Qasymbek jaýaby

ASTANA. KAZINFORM – Búgin Astana qalalyq máslıhatynyń kezekti sessııasynda qala basshysy Jeńis Qasymbek jańa jumys kestesiniń kólik keptelesin azaıtýǵa qalaı áser etkenin aıtty.  

Onyń aıtýynsha, keıingi kúnderi elordaǵa mol qar jaýyp, sporttyq jáne ózge de is-sharalar uıymdastyryldy. Bul qala joldarynda qıyndyq týdyrdy. 

– Qazirgi eń basty problema – trafık. Taıaý aıdyń ishinde LRT-ni iske qosamyz. Kóptegen jańa jol salyndy. Kelesi jyly Táýelsizdik dańǵylyn birshama uzartýdy josparlap otyrmyz. Ol Máńgilik el, Turan, Qabanbaı batyr dańǵyldaryna júktemeni tómendetedi. Negizgi keptelis Esil men Nura aýdandarynda kópir baǵytynda baıqalady. Eki jańa kópir jobalanyp jatyr, - dedi elorda ákimi.

Qala basshysy jumys kestesin jyljytý da oń áserin tıgizgenin aıtty. 

– Ákimdiktiń jumysqa 7:30-da, memlekettik organdardyń 8:00-de shyǵýy da óz áserin tıgizip otyr. Sizdermen kezdesýde tańerteńgi saǵat 8, 9, 10-da qaı kóshelerdiń qansha paıyzǵa bosaǵanyn aıtyp beremin. Qazir munyń bári 6:30-7:00-de bastalatyny ras. Qalaı degende de qalalyqtar úshin baǵdarsham men aıaldamalardy eskergende avtobýs qozǵalysynyń jyldamdyǵy ortasha eseppen saǵatyna 23-25 shaqyrymdy quraıdy. Qazir qazan-qarashamen salystyrǵanda jyldamdyqtyń saǵatyna 2,3 shaqyrymǵa artqanyn kórip otyrmyz, - dedi Jeńis Qasymbek.

29 qazanda Nura aýdanynyń turǵyndarymen kezdesken qala ákimi jumys kestesiniń ózgerýine qatysty túpkilikti qorytyndy jasaýǵa áli erte ekenin jáne ótpeli kezeńniń nátıjesin kútý keregin aıtqan edi.